Pune Traffic: तुम्हालाही आला मेसेज? 19 लाख पुणेकर वाहनचालकांवर टांगती तलवार, लायसन्स निलंबित होणार?

वाहतूक पोलिसांनी दिलेल्या माहितीनुसार, २६ फेब्रुवारी ते १ मार्च या कालावधीत थकीत दंड असलेल्या वाहनधारकांच्या नोंदणीकृत मोबाईल क्रमांकावर नोटीस पाठवण्यात येणार आहे. (MHPECH-G) या अधिकृत कोडवरूनच हे एसएमएस (SMS) येतील. नोटीस मिळाल्यापासून ३० दिवसांच्या आत दंडाची रक्कम न भरल्यास संबंधितांवर कठोर कायदेशीर कारवाई केली जाणार आहे.

अतिरिक्त पोलीस आयुक्त मनोज पाटील आणि वाहतूक पोलीस उपायुक्त हिंमत जाधव यांनी स्पष्ट इशारा दिला आहे की, ३० दिवसांच्या मुदतीत दंड न भरल्यास संबंधित चालकाचा परवाना (Driving License) निलंबित करण्याचा प्रस्ताव प्रादेशिक परिवहन कार्यालयाकडे (RTO) पाठवण्यात येईल. संबंधित प्रकरण न्यायालयात दाखल करण्यात येईल, ज्यामुळे वाहनधारकांना न्यायालयीन प्रक्रियेला सामोरे जावे लागेल.

नोटीस पाठवण्याच्या या प्रक्रियेत सायबर भामटे नागरिकांची फसवणूक करण्याची शक्यता आहे. त्यामुळे पोलिसांनी काही महत्त्वाच्या सूचना दिल्या आहेत. यानुसार, पोलीस कधीही APK फाईल पाठवत नाहीत, ती डाउनलोड करू नका. कोणालाही आपला OTP शेअर करू नका. तसंच केवळ अधिकृत वेबसाईट किंवा ॲपवरूनच दंड भरावा. संशयास्पद मेसेज आल्यास जवळच्या पोलीस ठाण्याशी संपर्क साधावा.

वाहनधारक अधिकृत संकेतस्थळ https://mahatrafficechallan.gov.in किंवा 'पुणे ट्रॅफिक पोलीस' (PTP) या मोबाईल ॲपवरून आपला दंड भरू शकतात. याशिवाय जवळच्या वाहतूक विभाग कार्यालयात जाऊन क्यूआर कोड, डेबिट किंवा क्रेडिट कार्डद्वारेही दंड भरण्याची सोय उपलब्ध आहे.