रोपवे कंपनीची मनमानी! रायगडावर उभारले आलिशान 'सिमेंटचे राजवाडे'; संभाजीराजेंनी काढले वाभाडे

पुरातत्त्व विभागाने ही कामे थांबवण्यासाठी रोपवे कंपनीला केवळ 'नाममात्र' नोटिसा दिल्या. मात्र, त्या डावलून कंपनीने ही बांधकामे पूर्ण केली आहेत. "एका व्यावसायिक कंपनीकडे इतके धाडस आणि आडमुठेपणा येतो कुठून? या कंपनीला नक्की कोणाचे पाठबळ आहे?" असा प्रश्न संभाजीराजेंनी उपस्थित केला आहे. महाराजांच्या गडावर सरकारी नियम धुडकावणाऱ्या या कंपनीच्या आर्थिक फायद्याला ऐतिहासिक मूल्यांपेक्षा अधिक महत्त्व दिले जात असल्याबद्दल त्यांनी खेद व्यक्त केला.

रायगड किल्ला नुकताच युनेस्को जागतिक वारसा स्थळांच्या नामांकनासाठी पात्र ठरला आहे. मात्र, अशा प्रकारची बेकायदेशीर बांधकामे होत राहिली, तर हे नामांकन धोक्यात येऊ शकते, असा इशारा संभाजीराजेंनी दिला आहे. या विद्रूप बांधकामांना जबाबदार कोण? पुरातत्त्व विभाग, सरकार की ही मुजोर कंपनी? असे प्रश्न आता शिवभक्तांमधून विचारले जात आहेत.