सुख-समृद्धीसाठी देवशयनी एकादशीला करा हे उपाय; सर्व समस्यांतून होईल सुटका

हिंदू धर्मात एकादशीला विशेष महत्त्व आहे. या दिवशी उपवास करून भगवान विष्णूची विधिवत पूजा केल्यास गेल्या जन्मातल्या पापांपासून मुक्ती मिळते. जीवनातल्या समस्या दूर होतात, असं मानलं जातं. दर वर्षी 24 एकादश्या येतात. यात प्रत्येक एकादशीचं महत्त्व वेगळं आहे. आषाढ महिन्याच्या शुक्ल पक्षात येणाऱ्या देवशयनी एकादशीचं महत्त्व जास्त आहे. यंदा 17 जुलैला देवशयनी एकादशी आहे. शास्त्रानुसार ही पुण्यप्रद तिथी मानली जाते. या दिवसापासून भगवान विष्णू चार महिन्यांसाठी योगनिद्रेत जातात. या दिवशी केलेल्या उपायांमुळे लक्ष्मीमातेची कृपादृष्टी लाभते.

ज्योतिषशास्त्रानुसार, देवशयनी एकादशीच्या दिवशी सकाळी स्नानानंतर स्वच्छ वस्त्र परिधान करावं. भगवान विष्णूची आराधना करावी. या दिवशी पिवळ्या रंगाला विशेष महत्त्व असतं. त्यामुळे शक्य असल्यास पिवळं वस्त्र परिधान करावं. देवघरात भगवान विष्णू आणि लक्ष्मी मातेच्या मूर्तीची स्थापना करावी. त्यानंतर भगवान विष्णूच्या मंत्राचा जप करावा. पिवळ्या रंगाच्या खिरीचा नैवेद्य दाखवावा. या उपायांमुळे कामात प्रगती होते आणि सर्व कामांत यश मिळतं.