गणेशोत्सवात बाप्पाला काय नैवेद्य दाखवावा? जाणून घ्या शास्त्र

गणपतीला दाखवायचा नैवेद्य म्हटलं की, सर्वप्रथम मोदक आणि गुळखोबरे या गोष्टी असायला हव्यात. मोदक हे तांदूळ, नारळ आणि गूळ यांच्यापासून तयार केले जातात. तांदळाचे मोदक करताना तांदळाच्या पिठाची उकड काढून त्याच्या मऊ पारीत गूळ आणि खोबऱ्याचं सारण भरतात. त्याला भरपूर कळ्या करून मोदकाचा सुंदर आकार दिला जातो. नंतर उकडून ते बाप्पाला नैवेद्य म्हणून दाखवले जातात. त्याचबरोबर कच्च्या खोबऱ्याची वाटी आणि त्यामध्ये गुळाचा खडा ठेवून तो नैवेद्य देखील गणपती बाप्पाजवळ कायम ठेवला जातो. असे देखील वेदांते यांनी सांगितले.

महाराष्ट्रात विविध धार्मिक कार्यक्रमांच्या वेळी गव्हाची खीर हा पारंपरिक पदार्थ आवर्जून बनवला जातो. खायला अतिशय चविष्ट आणि पौष्टिक अशी ही खीर गणपती बाप्पाचा देखील आवडता पदार्थ आहे. त्यामुळे गणेश चतुर्थीच्या दिवशी घरच्या घरी उपलब्ध असणाऱ्या कमी साहित्यात हा पदार्थ तयार केला जातो. तो देखील एक महत्त्वाचा नैवेद्य असतो, असेही वेदांते गुरुजींनी सांगितले.

गणेशोत्सव काळात प्रत्येक दिवशी सकाळी आणि संध्याकाळी नैवेद्य गणरायाला दाखवायला हवा. त्यामध्ये रोज पेढे, बर्फी, खडी साखर, फळे असा नैवेद्य आपण दाखवू शकतो. शिवाय महानैवेद्यही दाखवला जातो. यामध्ये रोजच्या पेक्षा थोडं वेगळं संपूर्ण जेवण बनवून देखील तो महानैवेद्य म्हणून गणरायाला दाखवला जातो.

गौरी आगमन आणि पूजनाच्या वेळी देखील विशेष नैवेद्य बनवला जातो. गौरी आगमनाच्या दिवशी शिदोरी वाटण्याची पद्धत आहे. त्यामध्ये भाकरी आणि झुमक्याची वडी यांचा समावेश असतो. त्याच्या दुसऱ्या दिवशी गौरी पूजनाच्या वेळी वऊसा असतो. त्यावेळी गौरीला सजवून गौरीचे वऊसा पूजन करताना पुरणपोळीचा नैवेद्य दाखवला जातो. तर गणपती विसर्जनाच्या दिवशी रोजचा महानैवेद्य दाखवूनच नंतर गणेश विसर्जन केले जाते.