लखनऊच्या अद्भुत हनुमान मंदिराचे रहस्य, जिथे नवाबही लावायचे हजेरी

मुंबई, 27 ऑगस्ट:  उत्तर प्रदेशातील लखनऊ तेथील सुसंस्कृतपणा, ऐतिहासिक मंदिरे, इमारती आणि पाककृतीसाठी जगभरात प्रसिद्ध आहे. लखनऊच्या अलीगंजमध्ये एक अतिशय प्राचीन हनुमान मंदिर आहे, ज्याचा इतिहास रामायण काळाशी संबंधित आहे. याविषयी असे म्हणतात की जेव्हा लक्ष्मणजी माता सीतेला वनवासात सोडून जात होते, तेव्हा संध्याकाळ झाल्यामुळे सीताजींनी येथे विश्रांती घेतली होती. लक्ष्मणजी लक्ष्मणटिला येथे गेले होते, तर हनुमानजी सीता मातेच्या रक्षणासाठी येथे उपस्थित होते. तेव्हापासून ते सिद्धपीठ म्हणून ओळखले जाऊ लागले. अवधचे शेवटचे नवाब वाजिद अली शाह हेदेखील या ठिकाणच्या आध्यात्मिक वैभवाने इतके प्रभावित झाले होते की ते आपल्या पत्नीसह या मंदिरात येत असत आणि येथे भंडारा करत असत.