Asia Cup : आशियामध्ये टीम इंडियाच वाघ, फायनलमध्ये दक्षिण कोरियाला चिरडलं, वर्ल्ड कपलाही थेट एन्ट्री!

बिहारमधील राजगीर येथे पहिल्यांदाच खेळल्या गेलेल्या या स्पर्धेत, टीम इंडियाला सुरुवातीपासूनच जेतेपदाचा दावेदार मानले जात होते. प्रशिक्षक क्रेग फुल्टन यांच्या टीमने हे दावे आणि अपेक्षा खऱ्या ठरवल्या आणि संपूर्ण स्पर्धेत एकही सामना न गमावता जेतेपद जिंकले. टीम इंडियाने पूल टप्प्यात त्यांचे तिन्ही सामने जिंकले होते. त्यानंतर सुपर-4 मध्ये, त्यांनी 3 पैकी 2 सामन्यांमध्ये विजय मिळाला. भारताला फक्त एका सामन्यात बरोबरीवर समाधान मानावे लागले. कोरियाविरुद्धचा सामना 2-2 ने बरोबरीत संपला होता.

रविवार, 7 सप्टेंबर रोजी झालेल्या फायनलमध्ये टीम इंडियाने धमाकेदार सुरुवात केली आणि पहिल्याच मिनिटात गोल करून 1-0 अशी आघाडी घेतली. स्पर्धेत सातत्याने चांगली कामगिरी करणाऱ्या सुखजीतने टीम इंडियासाठी खाते उघडले. पण, दुसऱ्या गोलसाठी टीमला बराच वेळ वाट पाहावी लागली आणि दिलप्रीत सिंगने पहिल्या हाफच्या समाप्तीच्या फक्त 2 मिनिटे आधी 2-0 अशी आघाडी मिळवून टीमला दिलासा दिला.