Inspirational Story : महाराष्ट्राच्या पोलिसाचा नादच खुळा; थेट युरोप गाजवलं

संदीप गुरमे हे मूळचे लातूर जिल्ह्यातील उदगीरचे आहेत. संभाजीनगर शहरामध्ये पोलीस खात्यामध्ये वरिष्ठ पोलीस निरीक्षक म्हणून कार्यरत आहेत. त्यांना लहानपणापासूनच पोहण्याची व व्यायामाची आवड होती. त्यांनी त्यांची हीच आवड जपली. तेव्हापासूनच पोहणे, व्यायाम करणे हे त्यांचं प्राधान्य राहिलं. आयर्नमॅन’ स्पर्धेसाठी त्यांनी मागील तीन वर्षांपासून तयारी चालविली होती. अखेर सलग दोनदा आयर्नमॅन बनण्याचा इतिहास त्यांनी घडवला आहे.

संदीप गुरमे हे अनेक वर्षांपासून या स्पर्धेची तयारी करत आहेत. मागील वर्षी सुद्धा त्यांनी या आयर्नमॅन स्पर्धेमध्ये पहिला क्रमांक पटकावला. युरोपमधील इस्टोनियाची राजधानी टॅलिन येथे ही स्पर्धा पार पडली. 3.8 किलोमीटर समुद्रात पोहणे, 180 किलोमीटर सायकलिंग आणि 42.5 किलोमीटर धावणे या तीन क्रीडा प्रकारांत ही स्पर्धा झाली. साधारण 17 ते 18 अंश सेल्सियस तापमानात एकसलग ही स्पर्धा पूर्ण करावी लागते. त्यामुळे ही स्पर्धा जगातील कठिणतम ट्रायथलॉन स्पर्धांपैकी एक समजली जाते. दोन वेळा आयर्नमॅन बनण्याचे यश संपादन करणारे देशातील पहिले वरिष्ठ पोलीस निरीक्षक ठरले आहेत. वयाच्या 52 व्या वर्षी आर्यनमॅन ही स्पर्धा दुसर्‍यांदा यशस्वीरित्या पार पाडली आहे.

या स्पर्धेत सलग दुसऱ्यांदा यश मिळवण्यात माझे कोच, पत्नी आणि आई वडिलांचा मोठा वाटा आहे. आमच्या पोलीस विभागात येणाऱ्या तरुणांनी रोज किमान एक तास तरी स्वत:साठी आणि व्यायामासाठी दिला पाहिजे. या क्षेत्रात फिटनेस अत्यंत गरजेची आहे. मी रोज नियमित व्यायाम करतो. त्यामुळे ही स्पर्धा जिंकल्याचा मला आनंद आहे, असे आयर्नमॅन संदीप गुरमे सांगतात.