IPL 2026 : मुंबई-राजस्थान सामना संकटात? गुवाहाटीमध्ये पाऊस पडणार? समोर आली मोठी अपडेट!

बरसापारा क्रिकेट स्टेडियमची खेळपट्टी बॅटिंगला मदत करणारी मानली जाते, त्यामुळे या सामन्यात फोर आणि सिक्सचा पाऊस पडून मोठ्या रन व्हायची अपेक्षा आहे. बरसापारामध्ये पहिल्या इनिंगचा सरासरी स्कोअर 160 तर दुसऱ्या इनिंगचा 153 रन आहे.

एक्युवेदरच्या रिपोर्टनुसार राजस्थान आणि मुंबई यांच्यातल्या सामन्यादरम्यान मैदानाच्या आजूबाजूला ढगाळ वातावरण असेल, पण पावसाची शक्यता कमी आहे. गुवाहाटीचं कमाल तापमान 28 डिग्री आणि किमान 18 डिग्री सेल्सियस असेल.

राजस्थान रॉयल्स आणि मुंबई इंडियन्स यांच्यात आतापर्यंत 31 सामने झाले आहेत, यात मुंबईने 16 आणि राजस्थानने 14 मॅच जिंकल्या आहेत.

रियान परागच्या नेतृत्वात खेळणाऱ्या राजस्थान रॉयल्सची यंदाच्या मोसमातली कामगिरी धमाकेदार झाली आहे. गुजरात टायटन्सविरुद्ध झालेल्या मागच्या सामन्यात राजस्थानचा 6 रननी विजय झाला होता. बॅटिंगमध्ये ओपनर यशस्वी जयस्वालने 36 बॉलमध्ये 55 रनची आक्रमक खेळी केली, तर तिसऱ्या क्रमांकावर बॅटिंग करणाऱ्या ध्रुव जुरेलने फक्त 42 बॉलचा सामना करून 5 फोर आणि 5 सिक्सच्या मदतीने 75 रन केले. वैभव सूर्यवंशीने 18 बॉलमध्ये 31 रन करून योगदान दिलं.

बॉलिंगमध्ये तुषार देशपांडेने 24 रन देऊन 1 विकेट घेतली. शेवटच्या ओव्हरमध्ये गुजरातला विजयासाठी 11 रनची गरज असताना तुषार देशपांडेने राजस्थानला थरारक विजय मिळवून दिला. लेग स्पिनर रवी बिष्णोईने 4 ओव्हरमध्ये 41 रन देऊन 4 विकेट घेतल्या.

दुसरीकडे मुंबई इंडियन्सना दिल्ली कॅपिटल्सविरुद्ध पराभवाचा धक्का बसला आहे. पहिले बॅटिंग करणाऱ्या मुंबईने 20 ओव्हरमध्ये 6 विकेट गमावून 162 रन केल्या. सूर्यकुमार यादवच्या 51 आणि रोहित शर्माच्या 35 रन वगळता मुंबईच्या कोणत्याच खेळाडूला मोठा स्कोअर करता आला नाही. बॉलिंगमध्ये दीपक चहर, बुमराह आणि सॅन्टनरने रन रोखल्या, पण शार्दुल ठाकूर, मयंक मार्कंडे आणि कॉर्बिन बॉशची धुलाई झाली. दिल्लीविरुद्धच्या पराभवाआधी मुंबईचा केकेआरविरुद्ध विजय झाला.