Smriti Mandhana : 'दीड महिन्यात स्मृतीने जे सहन केलं...', RCB ने ट्रॉफी जिंकताच श्रेयांका पाटील झाली इमोशनल

स्मृती मानधनाने 212.20 च्या स्ट्राईक रेटने बॅटिंग करत 3 सिक्स आणि 12 फोर मारल्या. आरसीबीची ही दुसरी डब्ल्यूपीएल ट्रॉफी आहे. डब्ल्यूपीएल 2026 मध्ये स्मृती मानधनाने सर्वाधिक रन केले, ज्यामुळे तिला ऑरेंज कॅप देऊन गौरवण्यात आलं. स्मृतीने डब्ल्यूपीएलच्या या मोसमात 377 रन केले. आरसीबीच्या या विजयानंतर स्मृतीसह तिच्या टीममधल्या खेळाडूही भावूक झाल्या.

मागच्या दीड महिन्यामध्ये स्मृतीने बरंच काही सहन केलं आहे, त्यामुळे हा विजय तिला समर्पित असल्याची प्रतिक्रिया आरसीबीची खेळाडू श्रेयांका पाटीलने दिली आहे. नोव्हेंबर महिन्यामध्ये स्मृती मानधनाचं पलाश मुच्छलसोबत लग्न होणार होतं, पण लग्नाच्या काही तास आधीच हा सोहळा रद्द केला गेला. स्मृती आणि पलाशच्या या लग्नावरून बरेच वादही रंगले. अखेर स्मृतीने लग्न रद्द झालं असून आम्ही दोघेही वेगळ्या मार्गाने जात असल्याचं सोशल मीडियाच्या माध्यमातून जाहीर केलं.

वैयक्तिक आयुष्यामध्ये एवढं मोठं वादळ येऊनही स्मृती खचली नाही. पुढच्या काही दिवसांमध्येच ती पुन्हा एकदा मैदानात उतरली, एवढंच नाही तर तिने आरसीबीला दुसरी ट्रॉफी जिंकवून दिली आणि सर्वाधिक रन केल्याबद्दल ऑरेंज कॅपही मिळवली.