ठाण्यातील रीलस्टारच्या आलिशान बंगल्यात शस्त्रास्त्रांचा मोठा साठा, मिनी आर्मी तयार करत होता सुरेंद्र पाटील?

एका गुप्त माहितीच्या आधारे ठाणे गुन्हे शाखेच्या पथकाने दावडी येथील सुरेंद्र पाटील याच्या आलिशान बंगल्यावर मध्यरात्री छापा टाकला. झडती घेत असताना पोलिसांची नजर बंगल्यातील एका शू-रॅकवर पडली. बंगल्याच्या इंटिरिअरशी न जुळणारे हे कपाट पाहून पोलिसांना संशय आला. जेव्हा त्याची सखोल तपासणी करण्यात आली, तेव्हा त्यातील एका गुप्त कप्प्यात शस्त्रास्त्रांचा मोठा साठा दडवून ठेवल्याचं उघड झालं.

या कारवाईत पोलिसांनी तब्बल ७ बंदुका, ३७१ जिवंत काडतुसे आणि १६७ एअर गनच्या गोळ्या जप्त केल्या आहेत. जप्त करण्यात आलेल्या या साठ्याची किंमत सुमारे १० लाख रुपये असल्याचं सांगितलं जात आहे.

जप्त करण्यात आलेल्या सात बंदुकांपैकी पाच देशी बनावटीची पिस्तूलं आणि रिव्हॉल्व्हर आहेत, तर दोन एअर गन आहेत. धक्कादायक म्हणजे, काही पिस्तुलांवर 'Made in USA' आणि 'Special Auto' असं कोरलेलं आहे. पोलीस उपायुक्त अमरसिंह जाधव यांनी माहिती दिली की, इतक्या मोठ्या प्रमाणावर जिवंत काडतुसे सापडणं हे सूचित करतं की, हा साठा केवळ प्रदर्शनासाठी नसून तो वापरण्यासाठी सज्ज होता.

सुरेंद्र पाटील हा इन्स्टाग्रामवर प्रचंड सक्रिय असून त्याचे ३ लाखांहून अधिक फॉलोअर्स आहेत. स्वतःची गुंडगिरी आणि 'भाईगिरी' दाखवणारे रिल्स तो सतत पोस्ट करत असतो. अटकेनंतर त्याने हा साठा केवळ रिल्समध्ये वापरण्यासाठी ठेवल्याचा दावा केला आहे. मात्र, त्याच्या गुन्हेगारी पार्श्वभूमीमुळे पोलीस या दाव्यावर विश्वास ठेवायला तयार नाहीत. हा शस्त्रसाठा स्थानिक गुन्हेगारांना पुरवण्यासाठी वापरला जात होता का? याचा तपास आता सुरू आहे.