Thane : ठाण्यात मेट्रो मार्गिकेतील अडथळा दूर; पण प्रशासनाचा हा निर्णय चर्चेत, नेमकं प्रकरण काय?

ठाणे शहरात सुरू असलेल्या विविध पायाभूत प्रकल्पांमुळे मोठ्या प्रमाणात वृक्षतोड होण्याची शक्यता निर्माण झाली आहे. ज्यात मेट्रो 4 आणि 5, बोरिवली-ठाणे भुयारी मार्ग तसेच साकेत-माजिवडा उन्नत मार्ग अशा अनेक प्रकल्पांनंतर आता ठाण्यात प्रस्तावित अंतर्गत वर्तुळाकार मेट्रो मार्गिकेसाठी तब्बल 3 हजारांहून अधिक झाडांवर परिणाम होणार आहे.

ठाणे शहरात गेल्या काही वर्षांत वाहतूक कोंडीची समस्या मोठ्या प्रमाणात वाढली आहे. शहरातील वाढती लोकसंख्या, वाहनांची संख्या आणि सुरू असलेली विविध विकासकामे यामुळे रस्त्यांवर ताण वाढला आहे. मेट्रो, भुयारी मार्ग, उन्नत मार्ग, रस्त्यांचे रुंदीकरण आणि जलवाहिनी टाकण्याच्या कामांमुळे अनेक ठिकाणी सतत खोदकाम सुरू असते. त्यामुळे वाहतुकीवरही परिणाम होत आहे.

ही समस्या सोडवण्यासाठी ठाण्यात अंतर्गत वर्तुळाकार मेट्रो मार्गिका उभारण्याचा प्रस्ताव तयार करण्यात आला आहे. हा आराखडा महा मेट्रो यांच्या मदतीने तयार करण्यात आला असून या प्रकल्पासाठी सुमारे 12 हजार कोटी रुपयांचा खर्च अपेक्षित आहे. केंद्र सरकारची मंजुरी मिळाल्यानंतर प्रकल्पाच्या कामाला वेग येणार आहे. दरम्यान या प्रकल्पामुळे हजारो झाडांवर होणाऱ्या परिणामामुळे पर्यावरणप्रेमींनी चिंता व्यक्त केली आहे.