अमेरिका हादरली, झाला मोठा हल्ला; वॉशिंग्टनमध्ये इस्रायलच्या 2 अधिकाऱ्यांच्या हत्येने जगभरात खळबळ

एकमेव हल्लेखोर ज्याची ओळख शिकागो येथील ३० वर्षीय एलियास रॉड्रिगेझ म्हणून पटली आहे. त्याने कॅपिटल ज्यूईश म्युझियमबाहेर ही हत्या केली. या घटनेतील बळींची ओळख सारा लिन मिलग्रिम आणि तिचा साथीदार यारॉन लिशिन्स्की अशी पटली आहे. हे दोघेही वॉशिंग्टन येथील इस्रायली दूतावासात काम करत होते. पोलिसांनी पकडल्यानंतर रॉड्रिगेझने आपले शस्त्र टाकून दिले आणि 'फ्री, फ्री पॅलेस्टाईन'च्या घोषणा दिल्या.

वॉशिंग्टनचे पोलीस प्रमुख पामेला स्मिथ यांनी सांगितले की, गोळीबार करण्यापूर्वी हा माणूस म्युझियमबाहेर इकडे-तिकडे फिरताना दिसला होता. त्याने चार लोकांच्या गटाजवळ जाऊन पिस्तूल काढले आणि गोळीबार केला. गोळीबारानंतर संशयित व्यक्ती म्युझियममध्ये शिरला आणि कार्यक्रमाच्या सुरक्षारक्षकांनी त्याला ताब्यात घेतले, असे स्मिथ यांनी सांगितले.

अमेरिकेचे अध्यक्ष डोनाल्ड ट्रम्प यांनी या हल्ल्याचा तातडीने निषेध केला. त्यांनी म्हटले डी.सी. मधील या भयानक हत्या ज्या स्पष्टपणे ज्यू-विरोधी भावनेतून घडल्या आहेत, त्या आता थांबल्या पाहिजेत. त्यांनी सोशल मीडियावर पोस्ट करत द्वेष आणि कट्टरतावादाला अमेरिकेत जागा नाही, असे म्हटले.