Success Story : इंजिनिअर रमला गावात, 100 गीर गाईचे केलं संगोपन, कोट्यावधीची उलाढाल, Video

जालना जिल्ह्यातील राजूर येथील या तरुणाचे नाव मारोती पालोदे आहे. घरची परिस्थिती सधन असल्याने त्यांनी स्पेन या देशात आपले अभियांत्रिकीचे शिक्षण पूर्ण केले. शिक्षण पूर्ण झाल्यानंतर इंजिनिअरिंग व्यवसायात नशीब आजमावून पाहिले. परंतु, घेतलेल्या एका निर्णयामुळे निराशेत जाण्याची वेळ आली. तेव्हा मात्र त्यांना गीर गाईंनी मानसिक स्थिरता दिली. गोसेवा माझ्या नशिबातच लिहिली होती, असे ते गमतीने सांगतात.

सध्या त्यांच्याकडे 100 हून अधिक गीर गाई आहेत. त्यांच्या योग्य व्यवस्थापनातून त्यांना दररोज 300 ते 400 लिटर दूध मिळते. या दुधाची 80 रुपये लिटरने विक्री होते. शिल्लक राहिलेल्या दुधापासून तूप, बासुंदी, पनीर, पेढे, लस्सी असे दुग्धजन्य पदार्थ ते बनवतात. दररोज 10 ते 15 हजार व्यवस्थापनाचा खर्च होतो, तर 30 हजार रुपये मिळतात. असा रोज 10 ते 15 हजार रुपये निव्वळ नफा ते कमावतात. वार्षिक कोट्यवधी रुपयांची उलाढाल ते करत आहेत.

पालोदे यांच्या गोठ्यातील अनेक गाई या ब्राझील येथील वळूचे वीर्य वापरून तयार केल्या आहेत. गीर गाईची दूध देण्याची क्षमता त्यांनी 27 लिटरपर्यंत वाढवली आहे.