बदलत्या हवामानाचा पपई पिकावर परिणाम, शेतकऱ्याने फिरवला 2 एकर बागेवर रोटाव्हेटर, मोठं नुकसान

पैठण तालुक्यातील मुरमा येथे पपईच्या भावातील मोठ्या घसरणीमुळे एक धक्कादायक घटना घडली. बाजारात फक्त 4 ते 6 रुपये किलो इतकाच भाव मिळत असल्याने, लागवडीचा खर्चही न निघाल्याने निवृत्ती कल्याण मापारी या शेतकऱ्याने स्वतःच्या दोन एकर पपईच्या उभ्या बागेवर रोटाव्हेटर फिरवला.

निवृत्ती मापारी यांनी मागील वर्षी नोव्हेंबर महिन्यात दोन एकरात तब्बल दोन हजार पपईच्या रोपांची लागवड केली होती. पिकाची देखभाल, औषधे, पाणी, मजुरी यावर त्यांनी दोन लाख रुपयांहून अधिक खर्च केला. यावर्षी अतिवृष्टी आणि बदलत्या हवामानाचा पपई पिकावर मोठा परिणाम झाला. गेल्या दोन महिन्यांपासून उत्पादन येत असले तरी बाजारभाव सतत घसरत चालल्याने शेतकऱ्यांच्या हातात काहीच उरत नाही.

सध्या पपई तोडण्यासाठीच टनामागे सुमारे 350 रुपये मजुरी द्यावी लागते. मात्र मिळणारा भाव इतका कमी आहे की मजुरीदेखील निघत नाही. व्यापारी अत्यल्प दरातच खरेदी करीत असल्याने शेतकरी पपई तोडण्यासही उभा राहत नाहीत.

या परिस्थितीत मार्ग न सापडल्यामुळे निवृत्ती मापारी यांनी नैराश्यातून संपूर्ण पिकावर रोटाव्हेटर चालवण्याचा निर्णय घेतला. त्यांच्या म्हणण्यानुसार, दोन लाखांचा खर्च झाला… पण एवढेही उत्पन्न मिळणार नाही. पपईला भावच नाही. आम्ही काय करायचं? शेतकऱ्यांचे असे मत आहे की पपई दरांसाठी सरकारमार्फत स्वतंत्र समिती असावी, जी उत्पादन खर्चाचा विचार करून योग्य भाव निश्चित करेल. सध्या दर ठरविण्याची जबाबदारी बाजार समितीतील समन्वय समितीवर असल्याने व्यापाऱ्यांना जास्त प्राधान्य मिळते आणि शेतकरी तोट्यात जातात.

पपई उत्पादक शेतकऱ्यांवरील वाढत्या दुर्लक्षामुळे या पिकाचे उत्पादनच कमी होत चालल्याचा इशारा शेतकरी देत आहेत. सरकारने पपईला हमीभाव द्यावा, तसेच नुकसानीची पाहणी करून शेतकऱ्यांना नुकसान भरपाई द्यावी, अशी मागणी त्यांनी केली आहे.