सोयाबीनला 6 हजार भाव देणार, PM मोदींचं आश्वासन, पण शेतकऱ्यांनी सगळंच काढलं..

जालना: राज्यात सध्या विधानसभा निवडणुकांची रणधुमाळी सुरू आहे. त्यामुळे मतदारांना आकर्षित करण्यासाठी विविध घोषणा केल्या जात आहेत. मराठवाड्यात सोयाबीन उत्पादक शेतकऱ्यांची संख्या मोठी आहे. पंतप्रधान नरेंद्र मोदी यांनी देशातील सोयाबीन उत्पादक शेतकऱ्यांसाठी मोठी घोषणा केली आहे. विधानसभा निवडणुकीच्या पार्श्वभूमीवर राज्यातील सोयाबीन उत्पादक शेतकऱ्यांना 6 हजार रुपये एवढा हमीभाव देऊ, असं आश्वासन त्यांनी दिलंय.

सध्या राज्यात सोयाबीनला 4 हजार 892 एवढा हमीभाव आहे. मात्र खुल्या बाजारात सोयाबीनला साडेतीन हजारांपासून 4 हजार चारशे रुपयांपर्यंत दर मिळत आहे. शेतकऱ्यांना हमीभावापेक्षा 500 ते 1000 रुपये कमी दर मिळत असल्याने शेतकऱ्यांची नाराजी आहे. सोयाबीन उत्पादकांच्या नाराजीचा मुद्दा निवडणुकीमध्ये ऐरणीवर आल्याचं पाहायला मिळतंय. याच पार्श्वभूमीवर पंतप्रधान नरेंद्र मोदी यांनी 6 हजार हमीभाव देण्याची घोषणा केलीये. याबाबत जालना येथील शेतकऱ्यांनी लोकल18 सोबत बोलताना आपल्या रोखठोक प्रतिक्रिया व्यक्त केल्या आहेत.

जानेफळ येथील शेतकरी दादाराव मिसळ यांनी एक एकर क्षेत्रावर सोयाबीन पिकाची पेरणी केली होती. त्यांनी अजून या पिकाची काढणी केली नाही. सोयाबीनला शेंगाच नसल्याने पिकाची काढणी केली नसल्याचे त्यांनी सांगितलं. तसेच शेतकऱ्यांना असे दर असतील तर सोयाबीनचा खर्चही निघणार नाही, अशी खंत त्यांनी व्यक्त केली.