Weather Alert : नववर्षाच्या पहिल्याच दिवशी महाराष्ट्रावर हिम लाटेचं सावट, हवामान खात्याकडून अलर्ट

नव्या वर्षाच्या स्वागताला महाराष्ट्रात हिवाळ्याची जोरदार साथ मिळणार आहे. भारतीय हवामान विभागाच्या अंदाजानुसार, 1 जानेवारी 2026 रोजी राज्यात मुख्यतः कोरडे आणि थंड हवामान राहील. उत्तरेकडून येणाऱ्या थंड वाऱ्यांच्या प्रभावामुळे किमान तापमान सामान्यपेक्षा 2 ते 4 अंशांनी खाली राहण्याची शक्यता आहे. राज्याच्या बहुतांश भागात पावसाची कोणतीही शक्यता नाही, तर आकाश स्वच्छ ते आंशिक ढगाळ राहील. सकाळी काही ठिकाणी हलके धुके जाणवू शकते.

कोकण विभागात हवामान सुखद राहील. किमान तापमान 18 ते 20 अंश सेल्सिअस, तर कमाल तापमान 31 ते 33 अंश सेल्सिअसच्या आसपास राहील. मुंबईकरांना नववर्षाच्या जल्लोषात कोरड्या आणि मध्यम थंड हवामानाची साथ मिळेल, ज्यामुळे बीचवर किंवा मैदानावर उत्सव साजरा करणे सोयीचे ठरेल.

पश्चिम महाराष्ट्रात थंडीचा कडाका अधिक जाणवेल. येथे किमान तापमान 10 ते 15 अंश सेल्सिअसपर्यंत खाली जाऊ शकते, काही ठिकाणी 10 अंशांखालीही नोंदवले जाईल. कमाल तापमान 28 ते 31 अंश सेल्सिअस राहील. सकाळी धुक्याची शक्यता असल्याने वाहनचालकांनी काळजी घ्यावी.

उत्तर महाराष्ट्रातील जिल्ह्यांतही थंडीचा कडाका कायम राहील. किमान तापमान 10 ते 13 अंश सेल्सिअस दरम्यान राहील. सकाळी काही ठिकाणी धुके येण्याची देखील शक्यता आहे. नाशिकसह जळगाव आणि उर्वरित जिल्ह्यांत नागरिकांनी काळजी घ्यावी.

मराठवाडा विभागात कोरडे हवामान कायम राहील. किमान तापमान 10 ते 14 अंश, कमाल 28 ते 30 अंश सेल्सिअस अपेक्षित आहे. थंडीचा जोर कायम असला तरी 1 जानेवारीनंतर तापमानात किंचित वाढ होऊ शकते.

विदर्भात राज्यातील सर्वात थंड भाग राहील. किमान तापमान 8 ते 12 अंश सेल्सिअस, कमाल 27 ते 30 अंश सेल्सिअस राहील. सकाळी गारठा आणि हलके धुके शक्य आहे, ज्यामुळे नागरिकांना जाड कपडे आणि उबदारपणा आवश्यक ठरेल.

एकूणच, महाराष्ट्रात 1 जानेवारीला हिवाळ्याची मजा घेता येईल. उत्तर भारतातील दाट धुक्याचा थेट परिणाम राज्यावर होणार नसला तरी थंड वारे राज्याला गारठवतील. आयएमडीच्या अंदाजानुसार, पुढील काही दिवस थंडी कायम राहील.