सांगलीच्या डॉक्टरांची कमाल, 5 मेंढ्यांच्या पालनातून मालामाल, एका कोकराला 3 लाखांचा भाव!

सांगली: भरघोस अर्थिक उत्पन्न मिळवून देण्यासाठी प्रसिद्ध असलेली 'माडग्याळी' ही सांगलीच्या जत तालुक्यातील मेंढ्यांची लोकप्रिय प्रजात आहे. याच लोकप्रिय माडग्याळी मेंढ्यांसह देशी शेळ्यांचे पालन करत आटपाडीच्या डॉक्टरांनी पशुपालनाची आवड जोपासली आहे. आटपाडी येथील रहिवासी असलेले मच्छिंद्र पाटील पेशाने डॉक्टर आहेत. आटपाडी शहरामध्ये गेल्या अनेक वर्षांपासून ते रुग्ण सेवा करतात. क्लिनिक सोबतच त्यांनी शेती आणि पशुपालनाची आवड जपली आहे. याबाबतच लोकल18 शी बोलतान डॉ. मच्छिंद्र पाटील यांनी माहिती दिलीये.

डॉ. मच्छिंद्र पाटील यांनी गेल्या दीड वर्षांपासून मेंढीपालनास सुरुवात केली. जाणकार मित्रांच्या सल्ल्याने त्यांनी पाच माडग्याळी मेंढ्या आणि पाच देशी शेळ्या खरेदी केल्या. वडिलोपार्जित शेतामध्येच त्यांनी मुक्त आणि बंदिस्त दोन्ही प्रकारचे गोठे बांधले. शेळ्या-मेंढ्यांचा सांभाळ करण्यासाठी त्यांनी पूर्णवेळ एक व्यवस्थापक नेमला आहे. "मी माझ्या मित्रांचे पाहून शेळ्या-मेंढ्या पाळण्याचा निर्णय घेतला. मला शेती आणि पशुपालनबद्दल पहिल्यापासूनच लळा आहे. मेंढी पालनामुळे माझी आवड ही जपली जाते यासह भरपूर आर्थिक उत्पन्नही मिळते,” असे डॉ. मच्छिंद्र सांगतात.

शेळ्या-मेंढ्यांचे पालन हे शेतीपूरक व्यवसाय म्हणून अत्यंत फायदेशीर ठरतो. अल्पभूधारक शेतकऱ्यांना तसेच पशुपालनाची आवड असणाऱ्या प्रत्येकाला करता येणारा हा व्यवसाय असल्याचा अनुभव डॉ.मच्छिंद्र पाटील यांनी सांगितला.