सांगलीच्या ड्रोनदीदीला राष्ट्रपतींनी दिल्लीला बोलावलं, वैष्णवी शिंदेंची थक्क करणारी कहाणी

सांगली : भारतीय कृषी क्षेत्रात महिलांचा सहभाग अगदी पूर्वीपासूनच महत्त्वाचा राहिलाय. शेतीच्या उत्क्रांतीत लागवडीपासून काढणी-मळणी पर्यंत सर्वच कामात महिला आघाडीवर राहिल्या आहेत. आधुनिक आणि यांत्रिकीकरणाच्या शेतीमध्ये महिलांचा सहभाग वाढावा यासाठी भारत सरकारने नमो ड्रोन दीदी योजना सुरू केली आहे. याच योजनेचा लाभ घेत सांगलीच्या वैष्णवी शिंदे ड्रोन पायलट बनल्या आहेत. आधुनिक तंत्रज्ञान अवगत करत कृषी क्षेत्रात नवे पाऊल टाकल्याबद्दल ड्रोन दीदी वैष्णवी यांना राष्ट्रपतींकडून प्रजासत्ताक दिनाचे निमंत्रण मिळाले आहे. पाहुयात गृहिणी ते ड्रोन पायलट वैष्णवी शिंदे यांची यशोगाथा.

वैष्णवी परशुराम शिंदे सांगली जिल्ह्यातील मोहिते वडगावच्या रहिवाशी आहेत. सध्या त्या ड्रोन पायलट म्हणून काम करतात. बारावी पर्यंतचे शिक्षण पूर्ण केले असून पुढेही शिकण्याची त्यांची इच्छा आहे. त्यांनी केंद्र सरकारच्या नमो ड्रोन दीदी योजनेतून ड्रोन पायलटचे प्रशिक्षण पूर्ण केले आहे. पिकांवरती कीडनाशक, बुरशीनाशक आणि औषधांच्या फवारणीसाठी वैष्णवी यांना शासकीय योजनेतून ड्रोन मिळाला आहे.

पंतप्रधान नमो ड्रोन दिदी योजनेतून त्यांना मिळालेल्या ड्रोनच्या साहाय्याने त्यांना चांगले आर्थिक उत्पन्न मिळू लागले आहे. या माध्यमातून त्या मोहिते वडगाव आणि परिसरातील दोन तालुक्यांमध्ये फवारणी करत आहेत. सांगलीचा सोनहिरा परिसर हा ऊस पट्ट्यासह प्रयोगशील शेतीचा भाग असल्याने ड्रोन फवारणीसाठी मागणी वाढत आहे.

वैष्णवी यांचे पती परशुराम हे शेतकरी आहेत. स्वतःच्या शेतीसह ते गावातील ज्योतिर्लिंग कृषी सेवा केंद्रामध्ये काम करतात. ज्योतिर्लिंग कृषी सेवा केंद्र चालक अभिजीत खारगे यांच्या माध्यमातून शिंदे पती-पत्नीस ड्रोन योजने विषयीची संधी मिळाल्याचे त्यांनी सांगितले. कष्टाळू, प्रामाणिक आणि जिद्दी पती-पत्नींना योजनेचा लाभ मिळाल्याने परिसरातून त्यांचे कौतुक होत आहे.

वैष्णवी यांनी नमो ड्रोन दीदी योजनेसाठी ऑनलाईन अर्ज केला आणि काही दिवसात त्यांचा अर्ज मंजूर झाला. यानंतर त्यांनी सासवड- पुणे या ठिकाणी ड्रोन पायलटचे पंधरा दिवसाचे निवासी प्रशिक्षण घेतले. प्रशिक्षणानंतर दोन महिन्यात त्यांना ड्रोन घरपोच मिळाला. ड्रोन मिळाल्यानंतरही कंपनीच्या प्रतिनिधींकडून त्यांना तीन दिवसाचे प्रशिक्षण देण्यात आले. पुढील काही दिवस त्यांनी स्वतःच्या शेतावर सराव केला. आणि नंतर ऑर्डर प्रमाणे त्या शेतकऱ्यांच्या शेतावर ड्रोनद्वारे फवारणी करतात.

'लग्नानंतर खेड्यामध्ये आले तेव्हा काही करेन असे वाटले नव्हते. परंतु ड्रोन दीदी योजनेमुळे आणि पतीच्या पाठिंबामुळे मी माझी वेगळी ओळख निर्माण करू शकले' असे ड्रोन पायलट वैष्णवी शिंदे यांनी लोकल 18 शी बोलताना सांगितले.