मातीशी नाळ म्हणून विकत घेतली शेती, मित्राच्या एका सल्ल्यानं वर्षाला 60 लाखांची कमाई

सिंधुदुर्ग: कोकणचा प्रदेश हा निसर्ग संपन्न असल्याने नेहमीच इकडे पर्यटकांचा ओढा असतो. कोकणातील समुद्र, वनराई, वन्यजीव, ऐतिहासिक किल्ले आणि एकंदरीत निसर्ग हेच पर्यटकांचं आकर्षण केंद्र राहिलं आहे. अशातच सिंधुदुर्ग जिल्ह्यातील तुळसुलीचं एक कृषी पर्यटन केंद्र देखील पर्यटकांना भूरळ घालतंय. कुडाळ येथील गजानन गंगाराम कुडाळकर यांनी शेतीच्या आवडीतून हे नंदनवन फुलवलं आहे. आता या ठिकाणी पर्यटकांची मोठी गर्दी असते. याबाबतच कुडाळकर यांनी लोकल18 सोबत बोलताना माहिती दिलीये.

गजानन कुडाळकर हे मुळचे कुडाळचे असून त्यांना लहानपणापासूनच शेतीची आवड आहे. शेतीत काहीतरी वेगळं करण्याची त्यांची इच्छा होती. पण त्यांच्याकडे स्वत:ची शेतजमीन नव्हती. त्यामुळे त्यांनी कुडाळ तालुक्यातील तुळसुली या गावात 1990 मध्ये 35 एकर जमीन घेतली. या जमिनीत त्यांनी एक हजार नारळ आणि 4 हजार सुपराची झाडे लावली. काही काळात या ठिकाणी नंदनवन फुलल्याचं चित्र तयार झालं.