धाकट्यासाठी थोरला सालगडी म्हणून राबला! परतफेड म्हणून धाकट्या आदर्श निर्णय, राज्यभरात होतंय कौतूक

शिरसाट कुटुंबातील दिवंगत माणिकराव शिरसाट हे पंढरीचे नित्य वारकरी होते आणि त्यांनी सव्वातीन एकर कोरडवाहू जमिनीतून आपल्या तीन मुलांचं पालनपोषण केलं. त्यांचे मोठे अपत्य मधुकर शिरसाट यांनी कोळसांगवी येथे सालगडी म्हणून काम करत लहान भावाच्या शिक्षणाचा खर्च उचलला. याच आधारावर उद्धव यांना कृषीशास्त्रात उच्च शिक्षण घेता आले आणि पुढे ते कृषी संशोधक म्हणून देश-विदेशात कार्यरत झाले.

सोहळ्यात उद्धवराव शिरसाट यांनी आपल्या भावना व्यक्त करत सांगितले की, “आज माझ्याकडे जे काही आहे ते माझ्या आई-वडीलांच्या आणि भावाच्या त्यागामुळेच आहे. त्यामुळे माझं नैतिक कर्तव्य आहे की, त्यांच्या साक्षीने मी माझ्या हक्काचा त्याग करावा.” त्याच वेळी त्यांनी अधिकृतपणे हक्कसोड पत्र करून देत भावाला जमिनीचा अधिकार दिला.

यावेळी कीर्तनकार अतुल महाराज शास्त्री यांनी मातृऋण, बंधुत्व आणि कृतज्ञतेच्या भावनेवर प्रभावी कीर्तन सादर केलं. तर आभारप्रदर्शन करताना उद्धवराव यांनी आपल्या जीवनप्रवासात आई-वडिलांनी व मोठ्या भावाने दिलेल्या पाठिंब्याची आठवण करून दिली. त्यांच्या म्हणण्यानुसार, “मोठ्या भावाच्या त्यागाशिवाय मी आज इथं पोहोचूच शकलो नसतो.”