एकीकचं बळ काय असतं हे जैन समाजाने कार खरेदीतही दाखवून दिलं. जैन इंटरनॅशनल ट्रेड ऑर्गनायझेशन (JITO) च्या सदस्यांनी एकत्रितपणे BMW, ऑडी आणि मर्सिडीज-बेंझसह गाड्यांची खरेदी केली. एकाच वेळी १८६ कारची ऑर्डर देण्यात आली. आता एकाच वेळी इतकी मोठी ऑर्डर आल्यामुळे कंपनी आणि डिलर्सने घसघशीत २१ कोटी रुपयांचा डिस्काउंट दिला. ही डील आतापर्यंतची सर्वात मोठी डील ठरली आहे. JITO या संस्थेचा हा करार सध्या चर्चेचा विषय ठरला आहे. देशभरातील १५ हून अधिक लक्झरी कार डीलर्सशी वाटाघाटी करून त्यांच्या सदस्यांसाठी विशेष सवलती मिळवल्या.
advertisement
हा "पहिलाच प्रकारचा करार" होता ज्यामध्ये JITO ला कोणताही नफा झाला नाही, असं संस्थेचे उपाध्यक्ष हिमांशू शाह यांनी सांगितलं. तसंच, शाह यांच्या मते, यापैकी बहुतेक कार गुजरातमधील जैन समुदायाच्या सदस्यांनी खरेदी केल्या होत्या. जानेवारी ते जून दरम्यान ही वाहनं खरेदीदारांना देण्यात आली. सरासरी, प्रत्येक सदस्याने ८ ते १७ लाख रुपयांची बचत केली, जी अनेक प्रकरणांमध्ये दुसरी कार खरेदी करण्याइतकीच होती. हा उपक्रम नितीन जैन नावाच्या सदस्याने सुरू केला होता.
अशी सुचली आयडिया!
'काही JITO सदस्यांनी अशी कल्पना मांडली की जर त्यांनी सर्वांनी एकत्र कार खरेदी केल्या तर ते मोठ्या प्रमाणात ऑर्डर देऊ शकतो आणि चांगल्या सवलतींवर वाटाघाटी करू शकतो. हे डीलर्ससाठी देखील फायदेशीर ठरले, कारण त्यासाठी कोणतेही मार्केटिंग खर्च लागत नव्हता. या योजनेची बातमी पसरताच, देशभरातील JITO सदस्यांनी कार खरेदीसाठी पुढे आले.. अवघ्या काही महिन्यांतच, १८६ कारच्या ऑर्डर पूर्ण झाल्या, ज्यामुळे एकूण २१ कोटीची सूट मिळाली. २००७ मध्ये स्थापन झालेल्या JITO चे उद्दिष्ट देशभरातील जैन समुदायाच्या आर्थिक सक्षमीकरणाला चालना देणं आहे.
ग्रुप सदस्य फी 2 ते 20 लाख
विविध व्यवसायांमध्ये कार्यरत असलेले ६५,००० हून अधिक सदस्य आहेत. संस्थेची आजीवन सदस्यता २,००,००० ते २,००,००० पर्यंत आहे, त्यानंतर सदस्य या ग्रुप डीलचा लाभ घेऊ शकतात. तीन वर्षांपूर्वी, JITO ने "J Point" नावाचे एक प्लॅटफॉर्म लाँच केलं होतं, जिथे सदस्य ग्रुप खरेदी आणि विशेष ऑफरबद्दल जाणून घेऊ शकतात. या प्लॅटफॉर्मने यापूर्वी आयफोनपासून ते लक्झरी कारपर्यंत प्रत्येक गोष्टीवर असंख्य ग्रुप डीलची सुविधा दिली आहे. "गेल्या काही महिन्यांत, आमच्या सदस्यांनी ५० लाख ते १.५ कोटी किमतीच्या सुमारे १९० लक्झरी कार खरेदी केल्या आहेत. या एकत्रित डीलमुळे २१.५ कोटींची सूट मिळाली आहे," असं जे पॉइंट प्लॅटफॉर्मचे अध्यक्ष नितीन जैन म्हणाले.