BMC Election: महापालिका निवडणुकीच्या रणधुमाळीत भाजपचा स्ट्राईक, तब्बल २६ जणांवर केली निलंबनाची कारवाई, वाचा यादी, कारण काय?

Written by:Shrikant Bhosale

Last Updated:Jan 09, 2026 8:59 AM IST

BMC Election : मुंबई महानगरपालिका (BMC) निवडणुकीच्या पार्श्वभूमीवर भाजपने एक मोठा निर्णय घेतला आहे. पक्षशिस्त मोडणाऱ्या २६ पदाधिकाऱ्यांची पक्षातून हकालपट्टी केली आहे. यामध्ये अनेक माजी नगरसेवकांचा आणि महत्त्वाच्या पदाधिकाऱ्यांचा समावेश आहे.

इम्पॅक्ट शॉटतुमचा गेटवे लेटेस्ट न्यूज

महापालिका निवडणुकीच्या रणधुमाळीत भाजपचा स्ट्राईक, तब्बल २६ जणांवर केली निलंबनाची कारवाई, वाचा यादी, कारण काय?

मुंबई: मुंबई महानगरपालिका (BMC) निवडणुकीच्या पार्श्वभूमीवर भाजपने एक मोठा निर्णय घेतला आहे. पक्षशिस्त मोडणाऱ्या २६ पदाधिकाऱ्यांची पक्षातून हकालपट्टी केली आहे. यामध्ये अनेक माजी नगरसेवकांचा आणि महत्त्वाच्या पदाधिकाऱ्यांचा समावेश आहे. पक्षाच्या अधिकृत उमेदवारांविरोधात बंडखोरी करणे आणि महायुतीच्या उमेदवारांना सहकार्य न करणे, या कारणास्तव ही कारवाई करण्यात आली आहे. मुंबई महापालिका निवडणुकीत भाजपकडून मोठ्या प्रमाणावर बंडखोरी झाली होती. त्यानंतर ही कारवाई झाली.

मुंबई भाजपचे अध्यक्ष आमदार अमित साटम यांनी हे कारवाईचे आदेश जारी केले आहेत. बंडखोर उमेदवार पदाधिकाऱ्यांना पुढील ६ वर्षांसाठी पक्षाच्या प्राथमिक सदस्यत्वावरून काढून टाकण्यात आल्याची माहिती भाजपकडून देण्यात आली आहे.

कारवाईचे कारण काय?

मुंबई भाजपचे अध्यक्ष अमित साटम यांनी स्पष्ट केले की, "पक्षाने वारंवार विनंती करूनही हे पदाधिकारी महायुतीच्या उमेदवारांच्या विरोधात काम करत होते. पक्षाच्या विचारसरणीच्या आणि शिस्तीच्या विरोधात जाणाऱ्यांना स्थान दिले जाणार नसल्याचे त्यांनी स्पष्ट केले.

या कारवाईत नेहाळ अमर शाह (माटुंगा) यांच्यावर गंभीर आरोप ठेवण्यात आले आहेत. त्यांनी केवळ अधिकृत उमेदवाराविरुद्ध अर्ज दाखल केला नाही, तर पक्षाची प्रतिमा मलीन करण्याचाही प्रयत्न केला, असे भाजपच्या वरिष्ठ नेत्यांनी सांगितले. सर्वेक्षण आणि अंतर्गत मूल्यांकनानुसार ज्यांची जिंकण्याची क्षमता आहे, अशाच नवीन चेहऱ्यांना भाजपने यंदा संधी दिली असल्याचे सांगण्यात आले. मात्र, तरीही भाजपमध्ये बंडखोरी झाली.

गेल्या आठवड्यात भाजपने सुनीता यादव आणि माजी नगरसेवक जनक संघवी यांसारख्या नेत्यांची समजूत काढण्यात यश मिळवले होते. मात्र, ज्यांनी पक्षाचा आदेश धुडकावून लावत आपली उमेदवारी कायम ठेवली किंवा महायुतीला विरोध सुरू ठेवला, त्यांच्यावर आता ही कठोर कारवाई करण्यात आली आहे.

सर्वाधिक बंडखोरी भाजपात...

मुंबई महापालिका निवडणुकीत सर्वाधिक बंडखोरी भाजपात झाली असल्याचे समोर आले आहे. उमेदवारी अर्ज भरण्याच्या कालावधीत भाजपने नाराजांची समजूत काढण्याचे प्रयत्न केले. त्यानंतरही बंडखोरी कायम ठेवण्यात आली. मुंबई महापालिकेच्या एकूण जागांपैकी जवळपास १० टक्के जागांवर भाजपमध्ये बंडखोरी झाली असल्याचे दिसून आले आहे. ठाकरे गटात ७-८ जागांवर बंडखोरी झाली आहे. बंडखोर कोणाच्या विजयाचे गणित बिघडवणार की स्वत: बाजी मारणार हे निकालात दिसून येईल.