पोलिसांना आला मदतीचा फोन
गुरुवारी सायंकाळी चारच्या सुमारास शाहूपुरी पोलिसांना एका अज्ञात व्यक्तीचा फोन आला. अजिंक्यतारा किल्ल्याच्या दक्षिण दरवाजाजवळ एक तरुण आत्महत्या करण्याचा प्रयत्न करत असल्याची माहिती फोन करणाऱ्याने दिली. घटनेचे गांभीर्य लक्षात घेऊन शाहूपुरी पोलिसांनी तातडीने सातारा शहर पोलीस ठाण्याला कळवले. वरिष्ठ पोलीस निरीक्षक राजेंद्र मस्के यांच्या मार्गदर्शनाखाली पीसीआर व्हॅन, बीट मार्शल आणि दोन्ही पोलीस ठाण्यांची गुन्हे प्रकटीकरण पथके तात्काळ अजिंक्यतारा किल्ल्यावर पोहोचली.
advertisement
कड्याच्या टोकावरून खाली आणले
पोलिसांनी दक्षिण दरवाजावर जाऊन पाहिले असता, शांताराम लक्ष्मण पवार (वय-24, रा. समर्थ नगर, सातारा) नावाचा तरुण कड्याच्या अगदी टोकावर उभा होता. पीसीआर वाहनावरील चालक हवालदार बनकर आणि महिला हवालदार महाडिक यांनी शांतपणे त्याच्याशी संवाद साधला. त्यांनी त्याची समजूत घालून आत्महत्या करण्यापासून त्याला परावृत्त केले.
पोलिसांच्या बोलण्याचा सकारात्मक परिणाम झाला आणि तो तरुण कड्यावरून खाली उतरण्यास तयार झाला. पोलिसांनी त्याला सुरक्षितपणे खाली आणले. चौकशीदरम्यान, त्याने पत्नीसोबतच्या भांडणामुळे मानसिक तणावात असल्यामुळे आत्महत्येचा निर्णय घेतल्याचे सांगितले. पोलिसांनी या तरुणाला धीर देऊन त्याची वैद्यकीय तपासणी केली. त्यानंतर त्याला त्याच्या नातेवाईकांच्या ताब्यात देण्यात आले.
हे ही वाचा : 'उशिरा का आलीस?' म्हणत पती बनला हैवान; लाकडी दांडक्याने पत्नीला इतकी मारहाण केली की, त्यातच...
हे ही वाचा : Kolhapur News: बहिणीने 'अपशब्द' वापरला, भाऊ जिवानिशी गेला; लिफ्ट मागितली अन् मागून केले सपासप वार!