2 सराईत गुन्हेगार अन् 2 सोनार अटक
सातारा जिल्ह्यात वाढत्या गुन्ह्यांमुळे एलसीबीचे पोलीस हैराण झाले होते. पोलिसांना गोपनीय माहिती मिळाली की, सराईत गुन्हेगार सचिन संत्र्या भोसले हा त्याच्या 7 साथीदारांसोबत दरोडा, सोनसाखळी चोरी आणि घरफोड्या करत आहे. पोलिसांनी त्याच्या मागावर राहण्याचा निर्णय घेतला. सचिन भोसले आणि त्याचा साथीदार नदीम धर्मेंद्र काळे हे जिहे परिसरात येत-जात असल्याची माहिती पोलिसांना मिळाली. मग काय, पोलिसांनी वेश बदलून या चोरट्यांवर नजर ठेवली. 7 जुलै रोजी अखेर तो क्षण आला. सचिन भोसले त्याच्या मोटारसायकलवरून जात असताना पोलिसांनी जीवाची पर्वा न करता त्याचा पाठलाग केला आणि त्याला मोठ्या शिताफीने पकडले.
advertisement
या कारवाई अटक केलेल्यांमध्ये सचिन संत्र्या भोसले (रा. फडतरवाडी, ता. सातारा), नदीम धर्मेंद्र काळे (वय-22, रा. तुजारपूर, ता. वाळवा, जि. सांगली) अशी चोरट्यांची, तरआशिष चंदुलाल गांधी (वय-39, रा. रहिमतपूर, ता. कोरेगाव), संतोष जगन्नाथ घाडगे (वय-48, रा. देगाव, ता. सातारा) अशी सराफांची नावे आहेत.
पोलीस विरुद्ध सोनार समितीचा संघर्ष
चोरट्यांना पकडल्यानंतर पोलिसांनी चोरीचे सोने हस्तगत करण्याचा प्रयत्न सुरू केला, पण इथेही त्यांना मोठा संघर्ष करावा लागला. संशयितांनी कबूल केले की, त्यांनी चोरीचे सोने जिल्ह्यातील काही सोनारांना विकले आहे. या माहितीच्या आधारे पोलीस तपास करत असतानाच सराफ सुवर्णकार समितीच्या काही सदस्यांनी तपासकामात अडथळा आणण्याचा प्रयत्न केला. उमेश बनहाडे, प्रथमेश नगरकर (रा. पुणे) आणि शशिकांत दीक्षित (रा. सातारा) यांनी गुन्ह्यात समोर आलेल्या सोनारांची दिशाभूल करून त्यांच्यावर दबाव टाकला, जेणेकरून चोरीचे दागिने पोलिसांच्या हाती लागू नयेत. पण पोलिसांना या दबावाला न जुमानता आपला तपास सुरूच ठेवला.
7 जणांनी केल्या एकूण 23 चोऱ्या
पोलिसांनी सचिन भोसले आणि नदीम काळे यांना अटक केल्यानंतर त्यांनी 1 दरोडा, 8 सोनसाखळी चोरी, 3 जबरी चोर आणि 8 घरफोड्या आणि 3 इतर चोऱ्या, अशा एकूण 23 गुन्ह्यांची कबुली दिली. पोलिसांनी त्यांच्याकडून एकूण 52 लाख रुपये किमतीचे 52 तोळे, 1 ग्रॅम 530 मिली एकून अर्धो किलो सोने जप्त केले. याशिवाय, गुन्ह्यात वापरलेली 50 हजार रुपये किमतीची मोटारसायकल आणि एक कोयताही जप्त करण्यात आला आहे. ही टोळी एकूण सात जणांची होती, त्यापैकी दोघांना आतापर्यंत पकडले आहे. या टोळीने मसूर, उंब्रज, फलटण शहर, मल्हारपेठ, कराड तालुका, कराड शहर, सातारा तालुका, फलटण ग्रामीण, पुसेगाव, लोणंद आणि खंडाळा या पोलीस ठाण्यांच्या हद्दीत गुन्हे केले आहेत.
या महत्त्वपूर्ण कामगिरीमुळे पोलिसांचे सर्व स्तरांतून कौतुक होत आहे. पोलीस अधीक्षक तुषार दोशी, अप्पर पोलीस अधीक्षक डॉ. वैशाली कडूकर यांच्या मार्गदर्शनाखाली सपोनि रोहित फाण आणि त्यांच्या टीमने ही धाडसी कारवाई यशस्वी केली.
हे ही वाचा : प्रेम की डिप्रेशन? साखरपुड्यानंतर तरुणीने कृष्णा नदीत घेतली उडी, आत्महत्येचं नेमकं कारण काय?
हे ही वाचा : "फोटो व्हायरल करेन!" ब्लॅकमेल करत केला अत्याचार, नराधमाने विवाहितेचा अश्लील व्हिडीओ केला व्हायरल!