Success Story : बीडच्या दत्तात्रयची स्मार्ट शेती! पारंपरिक पिकाचा नाद सोडला, शेतात फक्त ८० रोपं लावली, वर्षाला करतोय १२ लाखांची कमाई

त्यांनी सुमारे दीड एकर क्षेत्रात ८० खजूराची झाडे लावली असून त्यातून दरवर्षी १० ते १२ लाख रुपयांचे उत्पन्न मिळते. आष्टी तालुका हा दुष्काळग्रस्त भाग असल्याने येथे कधी अतिवृष्टी तर कधी तीव्र दुष्काळाचा सामना करावा लागतो. त्यामुळे पारंपारिक पिकांचे वारंवार नुकसान होत होते. या पार्श्वभूमीवर घुले यांनी कमी पाण्यात येणाऱ्या खजूर शेतीचा पर्याय निवडला.

घुले यांनी ‘बार्ली’ जातीच्या खजूराची लागवड केली आहे. या पिकासाठी कमी पाणी लागते आणि उत्पादनही चांगले मिळते. साधारण एका एकरात ६५ झाडे लावता येतात. प्रत्येक झाडापासून सुमारे २०० किलोपर्यंत उत्पादन मिळू शकते. यामुळे एका झाडामागे सुमारे २० हजार रुपयांपर्यंत उत्पन्न मिळते. या खजुरांची चव गोड असून बाजारात त्यांना चांगली मागणी आहे.

खजूर शेती फायदेशीर असली तरी सुरुवातीचा खर्च मोठा आहे. बार्ली जातीच्या एका रोपाची किंमत सुमारे ४,५०० रुपये असल्याने सर्व शेतकऱ्यांना हा प्रयोग करणे शक्य होत नाही.