हवेतच विमानात विचित्र आवाज, 300 प्रवाशांचा जीव टांगणीला, एअर इंडियाच्या विमानात तांत्रिक बिघाड

एअर इंडियाचे AI102 हे विमान १५ मार्च रोजी न्यूयॉर्कहून दिल्लीसाठी निघाले होते. प्रवासाचे ६ तास पूर्ण होत असतानाच विमानात तांत्रिक समस्या जाणवू लागली. सूत्रांनी दिलेल्या माहितीनुसार, विमानात अचानक व्हायब्रेशन्स जाणवू लागले आणि मोठ्या आवाजामुळे प्रवाशांमध्ये भीतीचं वातावरण पसरलं. कोणतीही जोखीम न पत्करता वैमानिकाने तातडीने आयर्लंडच्या शॅनन विमानतळावर इमर्जन्सी लँडिंगचा निर्णय घेतला.

या घटनेबाबत एअर इंडियाने निवेदन दिलं आहे. "प्रवाशांच्या सुरक्षेसाठी म्हणून विमान डायव्हर्ट करण्यात आलं आहे. एअर इंडियाच्या उच्च सुरक्षा मानकांनुसार, सध्या या विमानाची कसून तांत्रिक तपासणी केली जात आहे. या प्रक्रियेला थोडा वेळ लागू शकतो," असं कंपनीने स्पष्ट केलं आहे. विशेष म्हणजे, ज्या विमानात हा बिघाड झाला, ते एप्रिल २०२४ मध्येच एअर इंडियाच्या ताफ्यात दाखल झालं होतं.

विमान आयर्लंडमध्ये उतरवल्यानंतर प्रवाशांना काही काळ विमानतळावरच थांबावे लागले. मात्र, एअर इंडियाने शॅनन विमानतळ प्रशासनाच्या मदतीने प्रवाशांच्या राहण्याची आणि जेवणाची सोय हॉटेलमध्ये केली आहे. प्रवाशांना झालेल्या त्रासाबद्दल कंपनीने दिलगिरी व्यक्त केली असून, त्यांना लवकरात लवकर दिल्लीला पोहोचवण्यासाठी पर्यायी व्यवस्था केली जात आहे.