अहमदनगरमध्ये राष्ट्रवादी शरद पवार गटाला मोठं खिंडार, रोहित पवारांचा विश्वासू शिलेदार शेकडो कार्यकर्त्यांसह भाजपात

पवनराजे राळेभात यांनी चौंडी येथे राम शिंदे यांच्या निवासस्थानी आपल्या शेकडो समर्थकांसह भाजपामध्ये प्रवेश केला. पवनराजे राळेभात यांचा भाजपा प्रवेश आमदार रोहित पवार यांना मोठा धक्का मानला जात आहे. राष्ट्रवादी काँग्रेसचा जामखेड शहरातील प्रमुख चेहरा असलेले पवनराजे राळेभात यांचा शहरात मोठा समर्थक वर्ग असल्याने जामखेड शहरात भाजपाची ताकद वाढणार आहे. तर राळेभात यांच्या भाजपा प्रवेशाने राष्ट्रवादीला मोठं खिंडार पडलं आहे.

advertisement

रोहित पवारांची आज पुन्हा ईडीकडून चौकशी 

दरम्यान दुसरीकडे बारामती अ‍ॅग्रो कथित गैरव्यवहार प्रकरणात राष्ट्रवादी शरद पवार गटाचे आमदार रोहित पवार यांची आज पुन्हा एकदा ईडी चौकशी होणार आहे. यापूर्वी २४ जानेवारी रोजी त्यांची या प्रकरणात पहिल्यांदा ईडीकडून चौकशी झाली होती. आज पुन्हा एकदा रोहित पवारांची ईडी चौकशी होणार आहे. बारामती अ‍ॅग्रो कथित गैरव्यवहार प्रकरणी रोहित पवारांना ईडीने १९ जानेवारी रोजी समन्स बजावले होते. २४ जानेवारी रोजी तब्बल १२ तास रोहित पवारांची ईडीनं चौकशी केली होती.