TRENDING:
भारतीय जनता पक्षाने युवा नेते अमोल बालवडकर यांचे ऐनवेळी तिकीट कापले. त्यामुळे अजित पवार यांच्या राष्ट्रवादीत प्रवेश करून त्यांनी भाजपविरोधात थेटपणे मोर्चा उघडला आहे. अजित पवार यांनीही महापालिका निवडणुकीच्या अनुषंगाने पुणे शहरातील पहिली सभा अमोल बालवडकर यांच्यासाठी घेऊन त्यांना ताकद देत असल्याचे थेटपणे दाखवून दिले.
अश्रूंचा बदला मी अश्रूंनेच घेईन, बालवडकरांचा चंद्रकांतदादांना इशारा
advertisement
अमोल बालवडकर म्हणाले, कोथरूडमधून विधानसभेची उमेदवारी मागितली म्हणून माझ्यावर राग ठेवून माझी महापालिकेची उमेदवारी कापण्यात आली. तिकीट देतो म्हणून मला शेवटपर्यंत झुलवले. ज्यांनी माझ्या आई वडिलांच्या डोळ्यात अश्रू आणले, त्यांच्याही डोळ्यात राहिलेल्या चार वर्षात अश्रू आणून बदला घेईन. एका दादाने दीड वर्ष माझ्या विरोधात कट कारस्थान केले पण दुसऱ्या दादाने (अजित पवार) दीड तासात माझा राजकीय पुनर्जन्म केला.
आम्ही ज्यांना निवडून दिले त्या कॅबिनेट मंत्र्याने कामेच केली नाहीत
आम्ही ज्यांना निवडून दिले त्या कॅबिनेट मंत्र्याने (चंद्रकांत पाटील) आमच्या भागात काहीही विकास कामे केली नाहीत, असे सांगत बालवडकर यांनी 'लाव रे तो व्हिडिओ' पॅटर्न वापरून प्रभागातील रखडलेल्या विकास कामाचे व्हिडिओ दाखवले.
अजित पवार यांची बालवडकरांना ताकद, भाजपला खडे बोल सुनावले
अमोल बालवडकर याची काय चूक होती? एखादा निर्णय घेताना कार्यकर्त्यांशी नीट संवाद साधता येतो, त्यांच्याशी बोलता येते. पण उमेदवारीसाठी त्यांना शेवटपर्यंत त्यांना खेळवत ठेवले आणि ऐनवेळी त्यांचे तिकीट कापले. पक्ष वाढविण्याकरिता त्यांनी जीवाचे रान केले आणि तुम्ही त्यांना खड्यासारखे बाजूला केले, ही आपल्या महाराष्ट्राची संस्कृती आहे काय? असा सवाल करून अमोलच्या मागे मी ताकदीने उभा आहे, असे अजित पवार म्हणाले.