भंडाऱ्याच्या तुमसर पंचायत समितीचे भाजपचे माजी पंचायत समिती सभापती नंदू रहांगडाले यांनी त्यांच्या समर्थकांसह आज अजित पवारांच्या राष्ट्रवादी काँग्रेसमध्ये प्रवेश केला. हा भाजपला मोठा धक्का मानला जातोय.
नंदू रहांगडाले हे सध्या भाजपचे पंचायत समिती गट नेते आहेत. राष्ट्रवादी काँग्रेसचे आमदार राजू कारेमोरे यांच्या नेतृत्वात नंदु रहांगडाले यांच्यासह त्यांच्या समर्थकांनी मुंबई येथे राष्ट्रवादीचे नेते प्रफुल पटेल यांच्या प्रमुख उपस्थितीत अजित पवारांच्या राष्ट्रवादी काँग्रेसमध्ये प्रवेश केला.
advertisement
तुमसर नगरपालिकेची आगामी काळात निवडणूक होत आहे. या दृष्टीने हा पक्षप्रवेश राष्ट्रवादी काँग्रेससाठी महत्त्वाचा मानला जातोय. नंदू रहांगडाले हे भाजपच्या तिकिटावर पंचायत समिती सदस्य निवडून आले असले तरी, ते शरद पवार पक्षाचे माजी आमदार चरण वाघमारे यांचे कट्टर समर्थक म्हणूनही ओळखले जातात.
राष्ट्रवादीचे संघटन अधिक बळकट होणार, प्रफुल पटेल यांना विश्वास
तुमसर पंचायत समितीचे माजी सभापती नंदू राहांगडाले यांच्यासह प्रमुख पदाधिकारी आणि कार्यकर्त्यांनी आज राष्ट्रवादी काँग्रेस पक्षात जाहीर प्रवेश केला. या प्रवेशामुळे राष्ट्रवादी काँग्रेस पक्षाचे संघटन अधिक बळकट होणार असून स्थानिक पातळीवर पक्षाला निश्चितच नवी ऊर्जा आणि बळकटी मिळणार आहे. नवीन सहकाऱ्यांचे पक्षात मनःपूर्वक स्वागत करून त्यांच्या पुढील राजकीय वाटचालीसाठी शुभेच्छा दिल्या.
या प्रसंगी आमदार राजु कारेमोरे, तुमसर विधानसभा अध्यक्ष देवचंद ठाकरे, तसेच तुमसर अल्पसंख्याक सेल तालुकाध्यक्ष यासिन छवारे यांच्यासह पक्षाचे अन्य पदाधिकारी व कार्यकर्ते उपस्थित होते.