समृद्धी महामार्ग अपघाताची पुनर्रावृत्ती टळली
बुलडाणा शहरासह जिल्ह्यातील धामणगाव बढे येथून चारधाम यात्रेसाठी 2 लक्झरी बस निघाल्या होत्या. यापैकी एका बसला मध्यप्रदेशातील शिवपुरी जिल्ह्यातील कोलारस नजीक शॉर्टसर्किटमुळे अचानक आग लागून संपूर्ण बस जळून खाक झाली. दरम्यान समय सुचकता राखत सर्व भाविक बसमधून बाहेर पडल्याने बचावले आहे. त्यामुळे बुलढाणा जिल्ह्यातील ‘समृद्धी’ महामार्गावरील गतवर्षीच्या अपघाताची मध्यप्रदेशमध्ये होणारी पुनर्रावृत्ती टळली.
advertisement
वाचा - पुण्यात बँड पथकावर कोसळलं भलंमोठं होर्डिंग! नवरदेवाचा घोडाही अडकला; थरकाप उडवणारे PHOTOS
प्राप्त माहितीनुसार बुलडाणा जिल्ह्यातून दोन लक्झरी बसद्वारे 60 भाविक केदारनाथ यात्रेसाठी 15 मे रोजी निघाले होते. एका बसमध्ये धामणगाव बढे येथील तर आग लागलेल्या बसमध्ये बुलडाणा येथील भाविक होते. मध्यप्रदेशातील शिवपुरी ते गुणा या फोरलेन महामार्गावरील कोलारस पोलीस ठाण्याच्या हद्दीत बैरसिया क्रॉसिंगनजीक बसमधून धुर निघत असल्याचे निदर्शनास आल्याने चालकाने बस थांबवली व सर्व भाविकांना सुखरूप खाली उतरवले. बसमधील सर्वच्या सर्व 30 भाविक सुखरुपपणे उतरण्यात यशस्वी झाल्याचे भाविकांपैकी एकाचे नातेवाईक असलेल्या उल्लास बढे पाटील यांनी सांगितले. या बसमध्ये 18 महिला व 12 पुरुषांचा समावेश होता. दरम्यान बसने चांगलीच आग पकडली होती. कोलारस पालिकेच्या अग्निश्यामक दलाने नंतर ही आग विझवली. परंतु, बस पुर्णत: जळून खाक झाली आहे. बसच्या एसीमध्ये शॉर्टसर्कीट होऊन ही आग लागल्याची चर्चा यात्रेकरूपैकी एकाने बोलून दाखवली आहे.