शिवसेना आमदाराची तुपकरांना धमकी
स्वाभिमानी शेतकरी संघटनेचे नेते रविकांत तुपकर हे गेल्या अनेक दिवसापासून लोकसभेच्या तयारीला लागलेत. आगामी लोकसभा निवडणुक कुठल्याही परिस्थितीत आपण लढवणार असल्याचं रविकांत तुपकर यांनी जाहीर केलं आहे. गेल्या काही काळात रविकांत तुपकरांनी कापूस आणि सोयाबीन उत्पादक शेतकऱ्यांसाठी अनेक आंदोलने केली. मात्र, रविकांत तुपकर शासनाची मदत शेतकऱ्यांना मिळणार असते, तेव्हाच आंदोलने करतात, रविकांत तुपकर यांच्या वकील पत्नी शर्वरी तुपकर यांनी शेतकऱ्यांचे पैसे बुडवणाऱ्या व्यापाऱ्याचे वकीलपत्र घेतले असा गंभीर आरोप करत शिंदे गटाचे आमदार संजय रायमुलकर यांनी रविकांत तुपकरांच्या कानशिलात लगावण्याची धमकी दिली आहे.
advertisement
रविकांत तुपकर हे आगामी लोकसभेचे उमेदवार मानले जात आहेत. तर मेहकर विधानसभेचे आमदार डॉ. संजय रायमुलकर हे शिवसेनेचे विद्यमान खासदार प्रतापराव जाधव यांचे खंदे समर्थक मानले जातात. त्यामुळे लोकसभा निवडणुका जाहीर होण्यापूर्वीच बुलढाणा जिल्ह्यातील राजकारण कडाक्याच्या थंडीत तापायला लागलंय. आमदार संजय रायमुलकर यांचा हा व्हिडिओ सोशल मीडियावर व्हायरल झाल्यानंतर रविकांत तुपकर यांनी देखील आपली प्रतिक्रिया दिली आहे. आमदार संजय रामुलकरांच्या असल्या धमक्यांना आपण भीक घालत नसल्याचे रविकांत तुपकर म्हणाले आहेत.
वाचा - गांधींची हत्या नथुरामने केली नाही? सावरकरांच्या दाव्यावर आव्हाड संतापले
गेल्या तीन टर्मपासून बुलढाणा लोकसभेवर शिवसेनेचे खासदार प्रतापराव जाधव यांचे वर्चस्व राहिले आहे. त्यामुळे बुलढाणा जिल्ह्यातील प्रतापगड शाबूत ठेवण्यासाठी आमदार संजय रायमुलकरांनी कंबर कसली असल्याचं पाहायला मिळत आहे. याप्रकरणी आतापर्यंत प्रतापराव जाधव यांनी माध्यमांसमोर बोलायचं टाळलं आहे. मात्र ऐन लोकसभा निवडणुकांच्या तोंडावर सुरू झालेले हे वाकयुद्ध एवढ्यात थांबेल असं वाटत नाही.