TRENDING:
सुशांत संतोष भोजने (रा. वरुडी, सध्या मुक्काम दावरवाडी शिवार) असे मृत तरुणाचे नाव आहे. गेल्या सहा महिन्यांपासून तो पोलिस भरतीसाठी कठोर सराव करत होता. दररोज पहाटे तो पैठण–पाचोड मार्गावर धावण्याचा सराव करीत असे. सोमवारी पहाटेही तो नेहमीप्रमाणे घरातून सरावासाठी बाहेर पडला; मात्र तो परतलाच नाही.
advertisement
कुटुंबीयांनी सर्वत्र शोध घेतला. नातेवाईक, मित्रमंडळींशी संपर्क साधला तरीही त्याचा ठावठिकाणा लागला नाही. अखेर पाचोड पोलिस ठाण्यात हरवल्याची तक्रार नोंदविण्यात आली. त्यानंतर शोधमोहीम सुरू असतानाच मंगळवारी दुपारी सुमारे 3 वाजण्याच्या सुमारास रहाटगाव शिवारातील एका मोसंबी बागेजवळ, रस्त्याच्या कडेला झुडपांत सुशांतचा मृतदेह आढळून आला.
घटनेची माहिती मिळताच वरुडीचे सरपंच अक्रूर गलधर, नानेगावचे सरपंच अनिल बोधने तसेच नातेवाईकांनी घटनास्थळी धाव घेतली. आपल्या तरुण मुलाचा मृतदेह पाहताच आई-वडिलांनी फोडलेला हंबरडा उपस्थितांच्या डोळ्यांत पाणी आणणारा होता.
पोलिस निरीक्षक महादेव गोमारे, उपनिरीक्षक अजीज शेख, उपनिरीक्षक सारंग आणि जमादार नरेंद्र अंधारे यांनी घटनास्थळी पोहोचून पंचनामा केला. मृतदेह उत्तरीय तपासणीसाठी पैठण येथील शासकीय रुग्णालयात पाठविण्यात आला. प्राथमिक तपासानुसार, धावण्याचा सराव करत असताना अज्ञात वाहनाने जोरदार धडक दिल्याने त्याचा मृत्यू झाला असावा, अशी शक्यता व्यक्त करण्यात येत आहे. याप्रकरणी पुढील तपास सुरू आहे.
शवविच्छेदनानंतर मंगळवारी सायंकाळी वरुडी येथे सुशांतच्या पार्थिवावर अंत्यसंस्कार करण्यात आले. एक जिद्दी खेळाडू आणि भावी पोलिस अधिकारी गमावल्याने दावरवाडी आणि वरुडी परिसरावर शोककळा पसरली आहे. या घटनेची पैठण पोलिस ठाण्यात आकस्मिक मृत्यूची नोंद करण्यात आली आहे.