राज्यात स्पष्ट बहुमत मिळून ८ दिवसानंतरही सरकार स्थापन झालेलं नाही. मुख्यमंत्रि‍पदानंतर मंत्रि‍पदावरून महायुतीत पेच आहे. यामुळे सरकारचा शपथविधी लांबणीवर पडला आहे. यातच एकनाथ शिंदे त्यांच्या मूळगावी गेल्यानं महायुतीची बैठकही रद्द करावी लागली.
एकनाथ शिंदे यांची प्रकृती बिघडल्याची माहिती समजताच देवेंद्र फडणवीस यांनी एकनाथ शिंदे यांना क़ॉल केला. एकनाथ शिंदे यांच्या प्रकृतीची विचारपूस देवेंद्र फडणवीस यांनी फोनवरून केली. प्रकृती ठीक नसल्यानं एकनाथ शिंदे यांनी शनिवारचे त्यांचे नियोजित कार्यक्रमही रद्द केले होते. शिवसेनेचे नेते दीपक केसरकर यांची भेटही त्यांनी घेतली नव्हती.
advertisement
रविवारी दुपारी शिंदे मुंबईत परतणार
दरम्यान, एकनाथ शिंदे यांची प्रकृती बिघडल्याची माहिती मिळताच रात्री उशिरा सुपुत्र खासदार श्रीकांत शिंदे हेसुद्धा दरे गावात दाखल झाले. एकनाथ शिंदे हे रविवारी दुपारपर्यंत पुन्हा मुंबईला परतणार असल्याची माहिती सूत्रांनी दिलीय. शिंदे मुंबईत परतल्यानंतर पुन्हा सरकार स्थापनेच्या हालचालींना वेग य़ेईल.
शपथविधी ५ डिसेंबरला
मंत्रिमंडळाचा शपथविधी ५ डिसेंबरला आझाद मैदानावर होणार असल्याची माहिती भाजपचे प्रदेशाध्यक्ष चंद्रशेखर बावनकुळे यांनी दिलीय. तसंच त्यांनी भाजप आमदार खासदारांसोबत घेतलेल्या व्हर्च्युअल बैठकीत बावनकुळे यांनी तुमच्या मनात आहे तेच मुख्यमंत्री होतील असं सांगत फडणवीसच मुख्यमंत्री होणार असल्याचे संकेत दिले.