हिंदवी करिअर अ‍ॅकॅडमीचा संचालक दशरथ विठ्ठल जाधव (सिल्लोड), आरोपीचा मित्र गणेश कृष्णा जगताप (रा.वडोद चाथा), प्रशिक्षणार्थी गणेश सोनूसिंग चव्हाण (रा. कोहळा तांडा), प्रशिक्षणार्थी प्रवीण लालचंद राठोड (रा. कोहळातांडा) अशी अपहरण करणाऱ्यांची नावं आहेत. तर अमोल गजानन मख, असं अपहरण झालेल्या विद्यार्थ्याचं नाव आहे.
advertisement
या प्रकरणी पोलिसांनी दिलेल्या माहितीनुसार, केळगाव येथील 20 वर्षांचा अमोल मख हा हिंदवी अ‍ॅकॅडमीमध्ये वर्षभरापासून पोलीस भरतीची तयारी करतो. याच दरम्यान अमोलची संचालक जाधव सोबत ओळख झाली. जाधवचं अ‍ॅकॅडमीमध्ये प्रशिक्षण घेणाऱ्या एका विद्यार्थिनीवर प्रेम होतं. तिच्याशी ओळख वाढवण्यासाठी संचालकाने अमोलची मदत घेतली. मात्र, काही दिवसांनी संचालक आणि अमोलमध्ये वाद झाल्याने त्याने अमोलचा प्रवेश रद्द केला. संचालक आणि संबंधित विद्यार्थिनीचे काही व्हॉइस रेकॉर्डिंग अमोलच्या मोबाईलमध्ये होते. अमोल हे पुरावे व्हायरल करून आपलं प्रेम प्रकरण बाहेर आणेल, अशी भीती संचालक जाधवला वाटली.
संचालक जाधवने अ‍ॅकॅडमीमध्ये शिक्षण घेणाऱ्या दोन मुलांना केळगाव येथे पाठवले. ती दोन मुलं अमोलला घाटात घेऊन आले. तिथे अगोदरच घेऊन बसलेला संचालक आणि त्यांच्या मित्राने अमोलला जबर मारहाण करत पुराव्यांची मागणी केली. अमोलने पुरावे देण्यास नकार दिल्याने आरोपींनी अमोलला एम एच 48 ए 9918 चार चाकीमध्ये बसून त्याचं अपहरण केलं. हा संपूर्ण प्रकार अमोलच्या ओळखीच्या व्यक्तीने बघितला. त्याने तात्काळ सिल्लोड पोलिसांना याबाबत माहिती दिली.
पोलिसांनी घटनेचं गांभीर्य लक्षात घेऊन सापळा रचला आणि आरोपींना भराडीजवळ अटक केली. आरोपींना सिल्लोड कोर्टात हजर केलं असता त्यांना 14 दिवसांची न्यायालयीन कोठडी सुनावण्यात आली. पोलीस निरीक्षक रवींद्र ठाकरे, उपनिरीक्षक लहू घोडे, कर्मचारी विश्वनाथ तायडे, यतीन कुलकर्णी, विठ्ठल नागरगोत, रामेश्वर जाधव, रमेश व्यवहारे, अनंत जोशी यांनी या प्रकरणाचा तपास केला.