TRENDING:
यश मोहन कुर्हाडे (वय २०, रा. केसनंद), वृषभ प्रदीप सिंग (वय २१, रा. चऱ्होली, आळंदी रस्ता) आणि प्राज विवेक भैरामडगीकर (वय १८, रा. येरवडा) असं अटक केलेल्या तिन्ही आरोपींची नावं आहे. पोलिसांनी या गुन्ह्यात साथ देणाऱ्या तक्रारदार महिलेच्या अल्पवयीन पुतणीला देखील अटक केली आहे. घटनेचा पुढील तपास पोलीस करत आहेत.
advertisement
नेमकं प्रकरण काय आहे?
मिळालेल्या माहितीनुसार, पुण्यातील कल्याणीनगर परिसरात भरदिवसा एका सदनिकेत घुसून दरोडा टाकण्याचा प्रयत्न करण्यात आला होता. दोन अज्ञात तरुण तोंडाला कपडा बांधून घरात घुसले होते. पण घरातील महिलेनं आरडाओरडा केला असता दोन्ही आरोपी पळून गेले. पोलिसांनी अवघ्या २४ तासांत या प्रकरणाचा छडा लावला. एका अल्पवयीन पुतणीने मित्राचे थकीत घरभाडे भरण्यासाठी काकूच्या घरीच दरोडा टाकण्याचा कट रचल्याचे तपासात समोर आले आहे.
ही घटना ५ जानेवारी रोजी दुपारी सव्वाचारच्या सुमारास कल्याणीनगर भागात घडली. तक्रारदार महिला आपल्या घरात होती. यावेळी चेहरा झाकलेले दोन अज्ञात व्यक्ती सुरी आणि दोरी घेऊन घरात घुसले. महिलेने त्यांना पाहताच आरडाओरडा करण्यास सुरुवात केली आणि दरवाजा बंद करण्याचा प्रयत्न केला. महिलेचा आवाज ऐकून सोसायटीतील रहिवासी जमा होऊ लागल्याने दोन्ही आरोपी पळून गेले. घटनेची माहिती मिळताच येरवडा पोलीस घटनास्थळी पोहोचले. पोलिसांनी परिसरातील सीसीटीव्ही फुटेज तपासले. त्यात एक व्यक्ती सोसायटीच्या परिसरात थांबलेला दिसला, ज्याने आपला चेहरा झाकलेला होता. पोलिसांनी तपास सुरू केला.
दरोड्याचा प्रयत्न झाला तेव्हा महिलेची अल्पवयीन पुतणी घरात उपस्थित होती. पोलिसांनी तिची चौकशी केली असता, तिने उडवाउडवीची उत्तरं दिली. तिच्या बोलण्यात पोलिसांना विसंगती आढळली. यामुळे पोलिसांचा संशय बळावला. सखोल चौकशीनंतर पुतणीने मित्राचे घरभाडे थकल्यामुळे काकूच्या घरात दरोडा टाकण्याचा कट रचल्याची कबुली दिली.