माझ्या नातवाचे तिकीट कापले, आजीने थेट भाजप मंत्र्याची अडवली वाट; नाद खुळा व्हिडीओ व्हायरल

महानगरपालिका निवडणुकंसाठी भाजपकडून उमेदवारी मिळावी यासाठी संबंधित आजीचा नातू इच्छुक होता. स्थानिक पातळीवर त्याने तयारीही केली होती. मात्र उमेदवारांच्या यादीत नाव न आल्याने कुटुंबीयांमध्ये नाराजीचे वातावरण होते. अखेर या नाराजीचा उद्रेक थेट मंत्र्यांसमोरच झाला. मंत्री चंद्रकांत पाटील हे कोल्हापूर येथे कार्यक्रमासाठी आले होते. त्यावेळी अचानक एका आजीने त्यांचा रस्ता अडवला. “माझ्या नातवाचं तिकीट का कापलं?” असा थेट सवाल करत आजीने आपली व्यथा मांडली. आजीचा रोखठोक सवाल आणि त्यामागची भावनिक बाजू पाहून उपस्थित कार्यकर्तेही क्षणभर अवाक झाले.

advertisement

आजीचा राग निवळला

या प्रसंगी चंद्रकांत पाटील यांनी संयम दाखवत आजीचा हात आपल्या हातात घेतला आणि तिला शांत करण्याचा प्रयत्न केला. 'यावेळी जमलं नाही, पण पुढच्या वेळी नक्की बघू', असे आश्वासन देत त्यांनी आजीची समजूत काढली. चंद्रकात पाटील यांच्या आश्वासनानंतर आजीचा राग काहीसा निवळला.

व्हिडीओ सोशल मीडियावर व्हायरल

या संपूर्ण घटनेचा व्हिडीओ सोशल मीडियावर व्हायरल होत आहे. निवडणुकीच्या धामधुमीत अनेकदा उमेदवारीवरून नाराजीचे सूर उमटतात, मात्र थेट आजीने मंत्र्यांना जाब विचारण्याची ही घटना वेगळीच ठरली आहे. कोल्हापुरातील या घटनेमुळे निवडणूक रणधुमाळीत असा हलकाफुलका पण लक्ष वेधणार प्रसंग सर्वांच्या लक्षात राहणारा ठरत आहे.