TRENDING:
नेमकी घटना काय?
अमृत सोलंकी (वय ५८) आणि सूरजबेन सोलंकी (वय ५२) हे धारावीत राहत होते. त्यांचा मुलगा शिवराम सोलंकी हा मुलुंड परिसरात आपला भंगारचा व्यवसाय करतो. अमृत सोलंकी यांना आपली पत्नी आपल्यावर 'काळी जादू' करते असा संशय होता, ज्यावरून त्यांच्यात वारंवार खटके उडत असत. ११ मार्च रोजी जेव्हा शिवराम आई-वडिलांना भेटायला गेला होता, तेव्हा वडिलांनी दारूच्या नशेत "तुझ्या आईला एका दिवशी संपवून टाकीन" अशी धमकी दिली होती.
advertisement
व्हिडिओ कॉलवर दिसला मृत्यूचा थरार
१३ मार्च २०२६ रोजी दुपारी दीडच्या सुमारास शिवराम नातेवाईकाच्या अंत्यविधीसाठी धारावीत आला होता. स्मशानभूमीत जाण्यापूर्वी तो आई-वडिलांच्या भेटीसाठी घरी पोहोचला. बराच वेळ दरवाजा ठोठावूनही प्रतिसाद मिळत नसल्याने त्याने वडिलांना फोन केला. वडिलांनी फोन कट करुन त्याला व्हिडिओ कॉल लावला.
कॉल सुरू होताच शिवराम हादरून गेला. समोर वडिलांच्या डोक्यावर आणि कपड्यांवर रक्ताचे डाग होते. वडिलांनी कॅमेरा फिरवला असता, समोर आई रक्ताच्या थारोळ्यात पडलेली दिसली. "मी तिचा गळा दाबून आणि बाटलीने वार करून खून केला आहे," अशी कबुलीही वडिलांनी कॅमेऱ्यासमोर दिली.
पोलिसांकडून आरोपीला बेड्या
शिवरामने तात्काळ शेजाऱ्यांच्या मदतीने दरवाजा तोडून घरात प्रवेश केला आणि आईला रुग्णालयात नेले, मात्र डॉक्टरांनी तिला मृत घोषित केले. या भीषण प्रकारानंतर शिवरामने आपल्या वडिलांविरुद्ध पोलिसांत तक्रार दाखल केली. धारावी पोलिसांनी हत्येचा गुन्हा दाखल करत अमृत सोलंकी यांना ताब्यात घेतले असून पुढील तपास सुरू आहे.