BMC Election: आजपासून महापालिका निवडणुकांचा धुरळा, उमेदवारी अर्ज भरण्यास सुरुवात, युती-आघाडीचा घोळ सुटणार?

येत्या १५ जानेवारी २०२६ रोजी मतदान होणाऱ्या २८ महानगरपालिकांमध्ये जालना आणि इचलकरंजी या नव्याने स्थापन झालेल्या दोन महानगरपालिकांचाही समावेश आहे. २८ महानगरपालिकांमध्ये बहुसदस्यीय प्रभाग रचना लागू असणार असून, बृहन्मुंबई महानगरपालिकेत मात्र एकसदस्यीय प्रभाग पद्धतीने निवडणूक होणार आहे. मुंबईतील २२७ जागांसह राज्यभरात एकूण २,८६९ जागांसाठी ही निवडणूक होत असून, सर्व महानगरपालिकांची मतमोजणी एकाच दिवशी म्हणजे १६ जानेवारी रोजी होणार आहे.

advertisement

नामनिर्देशन ऑफलाईनच

स्थानिक स्वराज्य संस्थांच्या निवडणुकांसाठी संगणकीय प्रणालीद्वारे नामनिर्देशनपत्रे आणि शपथपत्रे दाखल करण्याची सुविधा उपलब्ध करून देण्यात आली असली तरी, महानगरपालिका निवडणुकांमध्ये मात्र पारंपरिक ऑफलाईन पद्धतीनेच उमेदवारी अर्ज दाखल करावे लागणार आहेत.

राजकीय घडामोडींना वेग

महानगरपालिका निवडणुका जाहीर होताच राज्यातील राजकीय हालचालींना चांगलाच वेग आला आहे. मात्र, महायुती असो वा महाविकास आघाडी, दोन्ही बाजूंमध्ये जागावाटप आणि युतीच्या समीकरणांवर अजूनही चर्चेचे गुंते कायम आहेत. जागावाटप अंतिम टप्प्यात असल्याचे दावे केले जात असले तरी, कोणत्याही महानगरपालिकेबाबत सत्ताधारी किंवा विरोधी पक्षांकडून अद्याप अधिकृत घोषणा करण्यात आलेली नाही. त्यामुळे उमेदवारी अर्ज भरण्याची प्रक्रिया सुरू होत असतानाच राजकीय अनिश्चिततेचे सावट कायम आहे.