TRENDING:
दिलीप खेडकर यांनी २०२४च्या लोकसभा निवडणुकीत दिलेली माहिती आणि आता दिलेली माहिती यात बराच फरक आहे. काही महिन्यांपूर्वी झालेल्या लोकसभेत दिलीप खेडकर यांनी निवडणूक लढवली होती. त्यावेळी त्यांनी मनोरमा खेडकर यांच्याशी लग्न झाल्याचं सांगितलं होतं. तर आता २०२४ च्या विधानसभा निवडणुकीसाठी अर्ज करताना आपण विवाहित असल्याची माहिती दिलीप खेडकर यांनी प्रतिज्ञापत्रात दिलीय.
advertisement
लोकसभेला वंचित बहुजन आघाडीच्या तिकिटावर अहमदनगर लोकसभा मतदारसंघातून निवडणूक लढली होती. त्यात खेडकर यांना पराभवाचा सामना करावा लागला होता. लोकसभा निवडणुकीसाठी प्रतिज्ञापत्रात दिलीप खेडकर यांनी मनोरमा खेडकर या पत्नी असल्याचं सांगितलं होतं. दोघांच्या नावावर असलेली संपत्तीही जाहीर केली होती. तसंच कुटुंब एकत्र हिंदू कुटुंब असा उल्लेख केला होता.
दरम्यान, दिलीप आणि मनोरमा खेडकर यांनी २००९ मध्ये पुण्यात कौटुंबिक न्यायालयात घटस्फोटासाठी अर्ज केला होता. त्यांचा घटस्फोट २५ जून २०१० मध्ये मंजूरही झाला होता. घटस्फोटानंतरही दोघेही पती-पत्नी बाणेर परिसरात मनोरमा खेडकर यांच्या मालकीच्या बंगल्यात राहत होते.
पूजा खेडकरने वेगवेगळ्या मॉक इंटरव्ह्यूमध्ये सांगितलं होतं की, "तिच्या कुटुंबाचं उत्पन्न शून्य आहे. कारण आई-वडिलांचा घटस्फोट झाला आहे. त्यामुळे मी आईसोबत राहते." दिलीप खेडकर यांनी लोकसभा निवडणुकीवेळी प्रतिज्ञापत्रात आपली संपत्ती ४० कोटी असल्याचं जाहीर केलं होतं.
पूजा खेडकर हिच्यावर केंद्र सरकारने कारवाई करताना तिला भारतीय प्रशासकीय सेवेतून मुक्त केलं आहे. युपीएससी परीक्षेत खोट्या प्रमाणपत्रांचा वापर केल्याचा आरोप तिच्यावर आहे. युपीएससीने तिची उमेदवारी रद्द करत भविष्यात परीक्षेला बसता येणार नाही असंही सांगितलं होतं.