रायगड जिल्ह्यातील हाय व्होल्टेज समजल्या जाणाऱ्या महाड नगरपालिका निवडणुकीत मोठा ट्विस्ट समोर आला आहे. अर्ज दाखल करण्याच्या आजच्या तिसऱ्या दिवशी भारतीय जनता पार्टी व राष्ट्रवादीच्या कार्यकर्त्यांनी संयुक्त पत्रकार परिषद घेत भाजप आणि राष्ट्रवादीच्या युतीची घोषणा केली. खासदार सुनील तटकरे व भाजपचे रायगडचे नेते सतीश धारप यांच्या प्रयत्नातून ही युती झाल्याचे बोलले जात आहे. या युतीसोबत दोन्ही पक्षामध्ये फॉर्म्युला ठरल्याचीही माहिती समोर आली आहे.त्यामुळे फॉर्म्युल्यानुसार राष्ट्रवादीला जवळपास 15जागा तर भारतीय जनता पार्टीला 5 ते 6 असे जागावाटप झाले असून नगराध्यक्ष पद हे राष्ट्रवादीकडे राहणार आहे.
advertisement
दरम्यान या भाजप राष्ट्रवादीच्या युतीने महायुती फुटली आहे.त्याचबरोबर आता महायुतीतील घटक पक्ष असणाऱ्या शिंदे गटाविरोधातच राष्ट्रवादी आणि भारतीय जनता पक्षाची लढाई होणार असल्याने नगरपालिका निवडणूक रंजक मोडवर पोहोचली आहे.
आगामी होऊ घातलेल्या नगरपालिका निवडणूकीमध्ये राष्ट्रवादी काँग्रेस आणि भाजप असे आम्ही दोन्ही पक्ष संयूक्तपणे निवडणूकीला सामोरे जाणार आहोत. तसेच महाडमध्ये जसं आम्ही करतो आहे तसेच रायगड जिल्ह्यात अन्य ठिकाणी आम्ही अशाप्रकारची यूती करून निवडणूक लढवणार आहोत,असे देखील अनिकेत तटकरे यांनी सांगितले आहे.
दरम्यान भाजपसोबत युती संदर्भात आपल्या भाषणातून अनेक वेळा अनुकूलता दाखवणाऱ्या मंत्री भरत गोगावले यांना हा मोठा धक्का असल्याचं मानलं जात आहे.दरम्यान यावर आता गोगावले काय प्रतिक्रिया देतात? हे पाहणे महत्वाचे ठरणार आहे.