पुण्यातील कोथरूडचे आमदार आणि भाजप नेते चंद्रकांत पाटील यांना निलेश घायवळचे निरोप जात असल्याचं धंगेकर यांनी म्हटलं आहे. यावेळी धंगेकर यांनी पुण्यात चंद्रकांत पाटील यांच्या कार्यालयात काम करणाऱ्या पाटील नावाच्या व्यक्तीचा देखील उल्लेख केला. या पाटील नावाच्या व्यक्तीच्या फोनची तपासणी केली तर निलेश घायवळबाबतचे अनेक खुलासे होतील, असा दावा धंगेकर यांनी केला आहे.
advertisement
चंद्रकांत पाटील यांच्या ऑफिसमध्ये पाटील नावाचा व्यक्ती आहे, तो चंद्रकांत पाटील यांच काम बघतो. त्याच्या सर्व मोबाईलची आणि नंबरची चेकिंग पोलिसांनी केली पाहिजे. घायवळ आणि तो किती वेळा बोलला अन् दादांना (चंद्रकांत पाटील) किती वेळा निरोप दिला याची सगळी माहिती पोलिसांना मिळेल, असा खळबळजनक दावा रवींद्र धंगेकर यांनी केला.
यावेळी त्यांनी आपल्याच महायुती सरकारवर देखील निशाणा साधला आहे. त्यांच्याकडे सत्ता आहे. सत्तेत पोलीस काही करत नाहीत ही वस्तुस्थिती आहे. निलेश घायवळ एकटा काहीच करू शकत नाही. पोलिसांनी आज ठरवलं तर घायवळ नेस्तानाबूत होईल. त्यासाठी पोलिसांनी त्याच्यावर ज्यांचा अंकुश आहे, ज्यांनी ही पिलावळ वाढवली आहे, त्यांचा तपास करणं गरजेचे आहे, असं म्हणत रवींद्र धंगेकर यांनी अप्रत्यक्षपणे चंद्रकांत पाटलांवर निशाणा साधला.