अजित पवार यांच्या पक्षाचे फलटणचे आमदार दीपक चव्हाण यांच्यासह संजीवराजे नाईक निंबाळकर आणि रघुनाथराजे निंबाळकर यांनी शरद पवार यांच्या प्रमुख उपस्थितीत राष्ट्रवादी काँग्रेसमध्ये प्रवेश केला. या प्रवेशाला स्वत: शरद पवार, ज्येष्ठ नेते विजयसिंह मोहिते पाटील, प्रदेशाध्यक्ष जयंत पाटील, खासदार धैर्यशील मोहिते पाटील, खासदार अमोल कोल्हे आदी नेते उपस्थित आहेत.
फलटणमध्ये तुतारी वाजल्याशिवाय राहणार नाही, अमोल कोल्हे यांना विश्वास
advertisement
अमोल कोल्हे म्हणाले, याआधी फलटणला जेव्हा यायचो तेव्हा इथे तुतारी वाजलीच पाहिजे असे वाटायचे. पण अखेर आज योग आला. संजीवराजे नाईक निंबाळकर आणि रघुनाथराजे निंबाळकर यांनी निर्णय घेतला. दीपक चव्हाण आज पक्षात प्रवेश करत आहेत. आता फलटणमध्ये तुतारी वाजल्याशिवाय राहणार नाही, असे कोल्हे म्हणाले.
दिल्लीसमोर गुडघे टेकणं बस्स झालं, आता निर्णय घेण्याची वेळ, जनतेने ठरवलं
आतापर्यंत तेल, बिस्किट, साखर विकत घेता यायची. परंतु आमदार खरेदी करता येतात, हे भाजपने दाखवून दिले. आमदारांना ईडी सीबीआय सारख्या संस्थाचा धाक दाखवून यांनी आपल्या लोकांना पक्षात घेतले. पण महाराष्ट्रातील स्वाभिमानी जनतेने दिल्लीसमोर गुडघे टेकणं बस्स झालं असे म्हणत ताठ मानेने निर्णय घेण्याचे ठरवले आहे. इकडे हरियाणासारखी परिस्थिती निर्माण होणार नाही. राज्यात आपली महाविकास आघाडीच जिंकेल, असे कोल्हे म्हणाले.
मतांची झाली कडकी म्हणून लोकसभेनंतर झाली बहीण लाडकी, कोल्हे बरसले
मतांची झाली कडकी म्हणून लोकसभेनंतर झाली बहीण लाडकी... तिजोरीत खडखडाट असताना सरकारने तिजोरीची होळी करून सत्तेची दिवाळी करण्याचे ठरवेल आहे. त्यामुळे या सरकारला घरी बसविण्याची वेळ आली आहे, असे कोल्हे म्हणाले.