जालना: आयुष्यात काहीतरी करण्याची उत्कट इच्छाशक्ती असेल आणि प्रामाणिक प्रयत्न असतील तर आपण कोणतंही यश नक्कीच मिळवू शकतो. जालन्यातील महिला शेतकरी संगीता शिंदे यांनी हे सिद्ध करून दाखवले. केवळ दहावीपर्यंत शिक्षण घेतलेल्या शिंदे यांनी कधी सायकल देखील चालवली नाही. पण त्यांनी आता ड्रोन फवारणीचं प्रशिक्षण पूर्ण केलंय. जालना जिल्ह्यातील पहिल्या 'ड्रोन दीदी' होण्याचा मान त्यांनी मिळवला आहे. बचत गटाच्या माध्यमातून त्यांनी हे यश मिळवलं असून त्यांच्यावर कौतुकाचा वर्षाव होतोय.
advertisement
संगीता यांचा संघर्षमय प्रवास
संगीता शिंदे यांचा जिल्ह्यातील पहिली ड्रोन दीदी होण्याचा प्रवास सोपा नव्हता. सुरुवातीच्या काळात कुटुंबीयांनी बचत गट सुरू करण्यास देखील विरोध केला. पावलोपावली अडथळे होते. मात्र त्यांनी या अडथळ्यांवर मात करत आपलं इच्छित ध्येय पूर्ण केलंय. आता त्यांना केवळ तालुक्यातीलच नव्हे तर संपूर्ण जिल्ह्यातील महिलांना ड्रोन प्रशिक्षण देण्याची इच्छा आहे. याबाबत शिंदे यांनीच माहिती दिलीय.
4 फुटांच्या बेडवर लावली ज्वारी; टपोरे दाणे आणि भरगच्च कणीस करणार मालामाल
प्रशिक्षित महिला ठरणार 'ड्रोन दीदी'
पारंपरिक शेती करण्यासाठी आजकाल मनुष्यबळाचा अभाव आहे. त्यामुळे शेतकरी आधुनिक आणि यांत्रिक शेतीकडे वळत आहे. शेतात फवारणी करण्यासाठी अधिक वेळ लागतो. पिकांवर विविध कीटकनाशकांची फवारणी सुलभ पद्धतीने करता यावी तसेच आपत्कालीन परिस्थितीत शेतक-यांना मदत करता यावी, यासाठी ड्रोनद्वारे फवारणीची संकल्पना पंतप्रधान मोदी यांनी पुढे आणली आहे. या उपक्रमात महिला बचत गटांना ड्रोन देण्यात येणार आहेत. ड्रोन चालवण्यासाठी बचत गटांच्या महिलांना प्रशिक्षण दिले जात आहे. प्रशिक्षित महिलांना 'ड्रोन दीदी' म्हणून संबोधले जात आहे.
संगीता झाल्या पहिल्या ड्रोन दीदी
संगीता यांनी सांगितले की, "गावाकडे शेतात काम करत होते. तेव्हा एका वृत्तपत्रात आरसीएफ या केंद्र सरकारच्या आखत्यारित खत निर्मिती कंपनीने फवारणी करणान्यासाठी महिलांना ड्रोनचे प्रशिक्षण देण्याबाबतची जाहिरात दिली होती. ती जाहिरात वाचून मी नाव नोंदणी केली. यासाठी उमेद अभियानातील उपजिवीका विभागाचे जिल्हा व्यवस्थापक गणेश तिडके यांनी सहकार्य केले. पुढे ड्रोन पायलटच्या प्रशिक्षणासाठी निवड झाली. पुणे जिल्ह्यातील शिवडी इथे पीपीसीएस प्रशिक्षण सुरू झाले. इंग्रजी भाषेची जरा अडचण आली. मात्र जिद्दीने हे प्रशिक्षण पूर्ण केलं. पुढे फलटण येथेही ड्रोन पायलटचे प्रशिक्षण घेतले."
जिल्ह्यातील महिलांना प्रशिक्षण देणार
आता पुढे गुजरात येथे प्रशिक्षण होणार आहे. दरम्यान, जालना शहरातील स्व कल्याण घोगरे क्रीडा संकुलात मंगळवारपासून जानकी प्रशिक्षण सुरू झाले. यावेळी रेल्वे राज्यमंत्री रावसाहेब दानवे यांच्या हस्ते 'ड्रोन दीदी' म्हणून संगिता शिंदे यांचा सन्मान करण्यात आला. ड्रोन उपलब्ध झाल्यानंतर ड्रोनद्वारे आपण अगोदर शेतात किटकनाशक फवारणी करणार आहे. नंतर गावातील शेतकरी बांधवांना याचे महत्त्व पटवून देणार आहे. तसेच जालना जिल्ह्यातील शेतकरी महिलांनाही ड्रोनचे प्रशिक्षण देणार असल्याचे, संगिता शिंदे यांनी सांगितले.