Union Budget 2026: बजेट कधी सादर होणार? गोंधळ संपला, राष्ट्रपतींनी दिली मंजूरी, सरकारने अधिकृत तारीख जाहीर केली, 28 जानेवारीला...

नवी दिल्ली: संसदेचे बजेट अधिवेशन 28 जानेवारीपासून सुरू होणार असून 2 एप्रिलपर्यंत चालणार आहे, अशी माहिती केंद्रीय संसदीय कामकाज मंत्री किरण रिजिजू यांनी दिली. केंद्र सरकारच्या शिफारसीनुसार राष्ट्रपती द्रौपदी मुर्मू यांनी दोन्ही सभागृहांचे अधिवे शन बोलावण्यास मंजुरी दिली आहे.

advertisement

किरण रिजिजू यांनी ‘एक्स’ वर पोस्ट करत सांगितले की, “भारत सरकारच्या शिफारसीवरून माननीय राष्ट्रपती द्रौपदी मुर्मू यांनी बजेट अधिवेशन 2026 साठी लोकसभा आणि राज्यसभेचे अधिवेशन बोलावण्यास मंजुरी दिली आहे. हे अधिवेशन 28 जानेवारी 2026 ते 2 एप्रिल 2026 या कालावधीत पार पडेल.”

दोन टप्प्यांत पार पडणार अधिवेशन

मंत्र्यांच्या माहितीनुसार, बजेट अधिवेशनाचा पहिला टप्पा 13 फेब्रुवारीला संपेल. त्यानंतर संसदेला सुटी (recess) दिली जाईल. दुसरा टप्पा 9 मार्चपासून पुन्हा सुरू होईल आणि अधिवेशनाचा शेवट 2 एप्रिलला होईल.

ही विश्रांतीची कालावधी परंपरेनुसार विविध मंत्रालयांच्या अनुदान मागण्यांवर (Demands for Grants) चर्चा करण्यासाठी विभागीय स्थायी समित्यांकडून वापरली जाते.

1 फेब्रुवारीला बजेट, 20 जानेवारीला आर्थिक सर्वेक्षण

सूत्रांनुसार, केंद्रीय अर्थसंकल्प 2026 हा 1 फेब्रुवारीला संसदेत मांडला जाण्याची शक्यता आहे. यंदा 1 फेब्रुवारी हा रविवार येत असला तरी बजेट सादर होण्याची परंपरा कायम राहणार आहे. याआधी 20 जानेवारीला आर्थिक सर्वेक्षण (Economic Survey) संसदेत मांडले जाईल, अशीही माहिती देण्यात आली आहे.

29 जानेवारीला संसदेला सुटी

29 जानेवारी रोजी संसदेत कामकाज होणार नाही, कारण त्या दिवशी ‘बीटिंग द रिट्रीट’ सोहळा होतो. हा कार्यक्रम प्रजासत्ताक दिनाच्या समारंभांचा औपचारिक समारोप मानला जातो.

का महत्त्वाचे आहे बजेट अधिवेशन?

बजेट अधिवेशन हे संसदेच्या सर्वांत महत्त्वाच्या अधिवेशनांपैकी एक मानले जाते. याच अधिवेशनात केंद्रीय अर्थसंकल्प सादर व मंजूर केला जातो, आगामी आर्थिक वर्षासाठीचे महत्त्वाचे आर्थिक आणि कर-संबंधित कायदे मंजूर होतात, सरकारच्या आर्थिक धोरणांवर सविस्तर चर्चा होते. त्यामुळे बजेट अधिवेशन 2026 कडे संपूर्ण देशाचे लक्ष लागले आहे.