TRENDING:
आधी अडचण, आता दिलासा
कोस्टल रोडवरील विहार क्षेत्रांमध्ये पादचारी आणि पर्यटकांसाठी स्वतंत्र, स्वच्छ आणि सुरक्षित शौचालयांची सुविधा उपलब्ध नव्हती. त्यामुळे नागरिकांना गैरसोय सहन करावी लागत होती. या पार्श्वभूमीवर पालिका आयुक्त भूषण गगराणी यांच्या निर्देशानुसार महानगरपालिकेच्या घनकचरा आणि व्यवस्थापन विभागाने कोस्टल रोडवर सहा ठिकाणी अत्याधुनिक बायो-टॉयलेट्सची उभारणी केली आहे. पादचारी भुयारी मार्ग क्रमांक 2, 4, 6, 11, 12, आणि 14 या ठिकाणी ही सुविधा सुरू करण्यात आली आहे.
advertisement
सौरऊर्जेवर चालणारी अत्याधुनिक सुविधा
नवीन उभारण्यात आलेली ही मॉड्युलर बायो-टॉयलेट्स सौरऊर्जेवर कार्यरत असणार आहेत. प्रत्येक शौचालयामध्ये महिलांसाठी दोन स्वतंत्र सुविधा (एक पाश्चिमात्य आणि एक भारतीय पद्धतीचे), पुरुषांसाठी दोन, बालकांसाठी एक आणि दिव्यांगांसाठी एक स्वतंत्र पाश्चिमात्य पद्धतीचे शौचालय उपलब्ध आहे. याशिवाय सहा युरिनल, तीन वॉशबेसिन, सेन्सरवर आधारित आरसे, साबण डिस्पेन्सर, सॅनिटरी पॅड व्हेंडिंग मशीन आणि इन्सिनरेटरसारख्या आधुनिक सुविधांचा समावेश करण्यात आला आहे. पाण्यासाठी एक हजार लिटर क्षमतेची टाकी तसेच तीन हजार लिटर क्षमतेचा डीआरडीओ बायो-डायजेस्टर बसवण्यात आला आहे.
अमरसन्स उद्यानाजवळ, आकृती इमारत वाहनतळ परिसर, हाजी अली जंक्शन, वरळी दुग्धशाळेसमोर, बिंदूमाधव ठाकरे चौकाजवळ आणि खान अब्दुल गफार खान मार्गालगत या ठिकाणी नागरिकांसाठी ही सुविधा उपलब्ध करून देण्यात आली आहे. नव्याने सुरू करण्यात आलेल्या या शौचालयांसाठी नाममात्र पाच रुपये शुल्क आकारले जाणार असल्याची माहिती पालिकेच्या घनकचरा व्यवस्थापन विभागाने दिली आहे.