Mumbai : सकाळी 10.20 ची फास्ट ट्रेन; अंधेरीहून सुटताच असं काही घडलं की..., पोलिसांना करावा लागला तात्काळ हस्तक्षेप

अंधेरी स्थानकातून निघताच पोलिसांना बोलवण्याची वेळ

सकाळी सुमारे 10:20 वाजता अंधेरी स्थानकावरून सुटलेल्या फास्ट लोकलच्या महिलांच्या प्रथम श्रेणीच्या डब्यात तिकीट तपासणी सुरू असताना एका महिला प्रवाशाने मोबाईलवर यूटीएस एसी लोकल पास दाखवला. मात्र हा पास पाहताच तपासणी कर्मचाऱ्यांना संशय आला. पासवरील काही तपशील चुकीचे वाटत होते.

प्रवाशाकडून समाधानकारक उत्तर न मिळाल्याने तिला वांद्रे स्थानकावर उतरवण्यात आले. त्यानंतर डीसीटीआय कंट्रोलच्या मदतीने पासची पडताळणी करण्यात आली. तपासणीत हा पास पूर्णपणे बनावट असल्याचे समोर आले.

advertisement

कसा तयार केला बनावट पास...?

वांद्रे येथील तिकीट तपासणी कार्यालयात चौकशीदरम्यान संबंधित महिलेने कबुली दिली. तिने सांगितले की व्हॉट्सअॅपवरून मिळालेल्या आठ बनावट यूटीएस अॅप्सच्या मदतीने हा पास तयार करण्यात आला होता. या प्रकरणात रेल्वे सुरक्षा दलाच्या मदतीने महिलेला वांद्रे जीआरपी पोलिस ठाण्यात नेण्यात आले आणि पुढील कारवाई सुरू करण्यात आली.

दरम्यान काही दिवसांपूर्वीही अशाच प्रकारचे प्रकरण समोर आले होते. एसी लोकलमध्ये चार प्रवासी बनावट पाससह पकडले गेले होते. हे पास यूटीएस अॅपवर नव्हते तर मोबाईलमधील एका फोल्डरमध्ये फोटो स्वरूपात ठेवले होते. क्यूआर कोड नसणे आणि एकसारखे तिकीट क्रमांक असल्याने संशय बळावला. तपासणीनंतर हे पास एआयच्या मदतीने तयार करण्यात आल्याचे समोर आले होते.