TRENDING:
कांदिवली पश्चिम इथे न्यू लिंक रोडवर बुधवारी संध्याकाळी ७ वाजेच्या सुमारास भीषण अपघात झाला. कार चालकाने अचानक दरवाजा उघडल्याने फूड डिलिव्हरी पोहोचवणाऱ्या तरुणाचा अपघात झाला. या अपघातात तुवानकुमार यादव 27 वर्षीय तरुणाचा जागीच मृत्यू झाला. फूड डिलिव्हरी ॲपसाठी काम करत असताना तो पार्सल पोहोचवण्यासाठी निघाला होता, त्याच वेळी एका कार चालकाने उजव्या बाजूचा अंदाज न घेता अचानक कारचा दरवाजा उघडला. त्यामुळे कारच्या दरवाजाची धडक दुचाकीला बसली.
advertisement
नेमकं काय घडलं?
या भीषण अपघातात डिलिव्हरी बॉय दुचाकीवरुन खाली कोसळला. त्याच वेळी मागून येणाऱ्या टँकर त्याच्या डोक्यावरुन गेला आणि त्याचा जागीच मृत्यू झाला. मूळचा बिहारचा असलेला तुवानकुमार यादव गेल्या १० वर्षांपासून मुंबईत राहत होता. गेल्या ५ वर्षांपासून तो एका प्रसिद्ध फूड डिलिव्हरी ॲपसाठी काम करत होता. बुधवारी संध्याकाळी तो आपली इलेक्ट्रिक दुचाकी घेऊन ऑर्डर पोहचवण्यासाठी निघाला होता. कांदिवली मेट्रो स्टेशनजवळ एका पेट्रोल पंपाबाहेर ही धक्कादायक घटना घडली.
कुटुंबाचा आधार हरपला
अपघातानंतर तरुणाला तातडीने भारतरत्न डॉ. बाबासाहेब आंबेडकर रुग्णालयात दाखल करण्यात आलं. मात्र उपचारापूर्वीच डॉक्टरांनी त्याला मृत घोषित केलं. त्याच्या डोक्याला गंभीर दुखापत झाली होती. तुवानकुमारच्या भावाला फोनवरून ही माहिती मिळताच त्याने घटनास्थळी धाव घेतली, मात्र तोपर्यंत खूप उशीर झाला होता. कांदिवली पोलिसांनी याप्रकरणी कार चालक आफताब आलम (रा. गोवंडी) आणि टँकर चालक अनंतराय शिवनायक (रा. वडाळा) यांच्या विरोधात निष्काळजीपणाचा गुन्हा दाखल केला आहे. कार चालकाने आरशात न पाहता अचानक दरवाजा उघडल्यानेच हा अपघात घडल्याचे प्राथमिक तपासात समोर आले आहे.