TRENDING:
खोपोली एक्झिट ते सिंहगड इन्स्टिट्यूट या दरम्यान उभारण्यात येणारा सुमारे 13 किलोमीटर लांबीचा ‘मिसिंग लिंक’ प्रकल्प आता अंतिम टप्प्यात पोहोचला आहे. सध्या लोणावळा–खंडाळा घाटातून जाणारा प्रवास नागमोडी वळणांमुळे सुमारे 19 किलोमीटरचा होतो. या नव्या मार्गामुळे हे अंतर सुमारे 6 किलोमीटरने कमी होत असून प्रवास अधिक सुलभ आणि जलद होणार आहे.
advertisement
या प्रकल्पात उभारण्यात आलेली अभियांत्रिकी कामे विशेष लक्षवेधी ठरत आहेत. सुमारे 650 मीटर लांबीचा केबल-स्टेड पूल पूर्णत्वास गेला असून त्यावर सध्या रंगकाम सुरू आहे. तसेच 23.5 मीटर रुंदीचा जगातील सर्वात रुंद बोगदाही या मार्गाचा भाग आहे. या वैशिष्ट्यांमुळे या प्रकल्पाची नोंद गिनीज बुक ऑफ वर्ल्ड रेकॉर्ड आणि लिम्का बुक ऑफ रेकॉर्डमध्ये करण्यासाठी प्रस्ताव पाठवण्यात आला आहे.
घाटातील कोंडीला कायमचा दिलासा
मुंबई–पुणे द्रुतगती मार्गावरील खालापूर टोल नाका ते खंडाळा एक्झिट हा पट्टा वाहतुकीच्या दृष्टीने अत्यंत संवेदनशील मानला जातो. येथे मोठ्या प्रमाणावर वाहनांची गर्दी होते आणि घाटातील वळणांमुळे कोंडी अधिक वाढते. ‘मिसिंग लिंक’मुळे हा घाट विभाग मोठ्या प्रमाणात टाळला जाणार असल्याने वाहतूक सुरळीत होण्यास मदत होत आहे. यामुळे केवळ वेळेची बचत होत नाही, तर अपघातांची शक्यताही लक्षणीयरीत्या कमी होते.
डोंगराळ आणि अवघड भौगोलिक परिस्थितीत हा प्रकल्प उभारण्यात आला आहे. बोगदे, उंच पूल आणि सरळ मार्गिकेच्या माध्यमातून सुरक्षित आणि वेगवान प्रवासाचा पर्याय तयार करण्यात आला आहे. त्यामुळे हा प्रकल्प अभियांत्रिकी कौशल्याचा उत्कृष्ट नमुना म्हणूनही ओळखला जात आहे.
1 मेपासून मार्ग खुला
‘मिसिंग लिंक’ प्रकल्पाचे सुमारे 97 टक्क्यांहून अधिक काम पूर्ण झाले असून उर्वरित कामे अंतिम टप्प्यात आहेत. महाराष्ट्र दिनाच्या निमित्ताने 1 मेपासून हा मार्ग वाहनचालकांसाठी खुला करण्यात येणार आहे. या मार्गामुळे मुंबई–पुणे प्रवासाचा वेळ सुमारे 30 मिनिटांनी कमी होणार असून प्रवास अधिक सुरक्षित, जलद आणि सुकर होणार आहे.