TRENDING:
पूर्व इराण आणि लगतच्या अफगाणिस्तान भागावर गुरुवारपासून सक्रिय असलेला ‘वेस्टर्न डिस्टर्बन्स’ (पश्चिमी विक्षोभ), त्यासोबत पूर्व राजस्थानवर निर्माण झालेली वरच्या हवेतील चक्रीय स्थिती (upper air cyclonic circulation) आणि पूर्व राजस्थानपासून पूर्व-मध्य अरबी समुद्रापर्यंत पसरलेली द्रोणिका (trough) यामुळे हवामान अस्थिर होण्याची शक्यता आहे.
हा महत्त्वाचा हवामान बदल पूर्वेकडे सरकत असून त्यामुळे उत्तर-पश्चिमेकडील बहुतांश राज्यांमध्ये पाऊस, मेघगर्जना आणि जोरदार वारे वाहण्याची शक्यता आहे. यामध्ये जम्मू-काश्मीर, हिमाचल प्रदेश, पंजाब, हरियाणा आणि राजस्थान या राज्यांचा समावेश आहे.
advertisement
शनिवारपर्यंत या पावसाचा प्रभाव उत्तराखंड, उत्तर प्रदेश, मध्य प्रदेश आणि छत्तीसगडपर्यंत पसरण्याचा अंदाज आहे. या सर्व राज्यांमध्ये 8 एप्रिलपर्यंत विविध दिवशी पाऊस आणि जोरदार वाऱ्यांचा प्रभाव कायम राहू शकतो.
दरम्यान पूर्व झारखंडपासून दक्षिण छत्तीसगडपर्यंत पसरलेल्या आणखी एका द्रोणिकेमुळेही वातावरणात अस्थिरता निर्माण होत आहे. तसेच 7 एप्रिलपासून आणखी एक नवीन ‘वेस्टर्न डिस्टर्बन्स’ उत्तर-पश्चिम भारतावर परिणाम करणार असल्याची शक्यता आहे.
या हवामान बदलामुळे वाढत्या तापमानापासून काहीसा दिलासा मिळेल. मात्र उभ्या पिकांवर परिणाम होऊ शकतो म्हणून शेतकऱ्यांना सतर्क राहण्याचा सल्ला देण्यात आला आहे.
दरम्यान दिल्ली आणि आसपासच्या भागात हवामानात अचानक बदल दिसून येत आहे. शहरावर धुळीचे दाट आवरण पसरले असून वातावरण धूसर झाले आहे. IMD च्या सकाळच्या बुलेटिननुसार पुढील 24 तासांत दिल्ली आणि एनसीआर भागात 40 ते 50 किमी प्रतितास वेगाने वारे, मेघगर्जना आणि विजांचा कडकडाट होण्याची शक्यता आहे.
दिल्ली-एनसीआरमध्ये विकेंडपर्यंत हलक्या ते मध्यम पावसाच्या सरी सुरू राहण्याची शक्यता आहे. IMD ने शनिवारी ‘यलो अलर्ट’ जारी केला असून दुपार ते संध्याकाळदरम्यान हलका पाऊस, मेघगर्जना, विजांचा कडकडाट आणि 20 ते 30 किमी प्रतितास वेगाने वारे (कधी कधी 40 किमी प्रतितासपर्यंत) वाहण्याचा अंदाज व्यक्त केला आहे.
तसेच भोपाळ येथील हवामान केंद्राने इशारा दिला आहे की 5 एप्रिलपर्यंत मध्य प्रदेशातील अनेक भागांमध्ये मेघगर्जना, विजांचा कडकडाट, जोरदार वारे आणि गारपीट होण्याची शक्यता आहे.