Sachin Kumawat : कधी बिगारी, कधी विट भट्टीवर काम; खानदेशचा किंग सचिन कुमावतची इनसाइड स्टोरी

बिग बॉस मराठी 6 मध्ये आलेला खानदेशचा आवाज, खानदेशचा किंग म्हणजेच सचिन कुमावत. सचिन बिग बॉसच्या घरात सगळ्यांचं मनोरंजन करत आहेत. त्यांची ऐरणी बोली ऐकणं प्रेक्षकांसाठी जणू पर्वणीच ठरत आहे.

सचिनच्या गाण्यांना आजवर 24 कोटीहून अधिक व्ह्यूज मिळाले आहे. हे व्ह्यूज 24 हजार कोटींवर नेण्याची त्यांची इच्छा आहे. आज 24 कोटी व्ह्यूज मिळवणारे सचिन कुमावत कधी काळी 25 रुपयांसाठी विट भट्टीवर काम करायचे. पाहूयात त्यांच्या आयुष्याची इनसाइड स्टोरी 

सचिन कुमावत यांचा जन्म जळगाव जिल्ह्यातील जामनेर तालुक्यातल्या शेंदुर्णी गावात झाला. सचिन कुमावत मध्यमवर्गीय कुटुंबातून पुढे आले. त्यांचे वडील सुरुवातीला मजुरी करायचे. नंतर हळूहळू बिल्डिंग कॉन्ट्रॅक्टर झाले. मात्र अनेक वर्षे घरची परिस्थिती अत्यंत हलाखीची होती. सचिन यांचं दहावीपर्यंतचं शिक्षण शेंदुर्णी गावातच झालं. पुढे जळगावला जाऊन त्याने इंजिनिअरिंगचं शिक्षण घेतलं.

इंजिनिअरिंग करतानाच सचिन यांना संगीताची गोडी लागली.  मालेगावचे अशोक जाधव यांचा 'दे हाती' लोकगीत कॅसेट अल्बम ऐकून ते भारावून गेले. याच प्रेरणेतून त्याने वडिलांकडे कॅसिओ शिकण्याची इच्छा व्यक्त केली. त्यानंतर जळगावच्या गोदावरी संगीत महाविद्यालयात हार्मोनियमचे क्लासेस लावले आणि संगीतभूषण ही पदवी मिळवली.

बारावी सुरू असतानाच त्याचा संगीतप्रवास सुरू झाला. सेकंड इअरला असताना सचिन यांनी त्यांचा पहिला म्युझिक अल्बम केला होता. 

सचिनच्या आयुष्यातील सर्वात कठीण काळ सहावीत असताना आला होता. घरची परिस्थिती इतकी वाईट होती की अंगावरच्या बनियनवर भोकं पडली होती. त्या काळात त्यांची आई मिस्त्रीच्या हाताखाली बिगारी काम करायची. मिळालेल्या शंभर सव्वाशे रुपयांत तिने घरच्यांसाठी बाजार केला आणि सचिनसाठी बनियन, अंडरवेअर आणली. हा प्रसंग आठवून सचिन आजही भावुक होतात. 

सचिन यांचा मोठा भाऊ जळगावला जाऊन मजुरी करायचा. आठ दिवस बाहेर एक दिवस गावी यायचा. त्यांनी आणलेल्या पैशांवर आठवडाभर घर चालायचं. सचिन नववीत असताना वडिलांना बिल्डिंग कॉन्ट्रॅक्टमध्ये चांगलं काम मिळालं आणि घरचे दिवस बदलले. 

v